ஜேம்ஸ் கேமரூன் இயக்கத்தில் 2009-ம் ஆண்டு வெளியாகி, உலகமெங்கும் மாபெரும் வெற்றி பெற்ற படம் ‘அவதார்’. உலக அளவில் அதிகம் வசூலித்த படம் என்ற சாதனையை இந்தப் படம் பெற்றிருக்கிறது. இதன் அடுத்த பாகமான ‘அவதார்: தி வே ஆஃப் வாட்டர்’ கடந்த 2022-ம் ஆண்டு வெளியாகி வசூலில் சாதனை படைத்தது.
இதன் 3-ம் பாகம், 2025-ம் ஆண்டு டிச.19-ம் தேதி வெளியாகிறது. இந்நிலையில் படத்தின் தலைப்பை, இயக்குநர் ஜேம்ஸ் கேமரூன் நடிகர்கள் ஜோ சல்டானா, சாம் வொர்திங்டன் அதிகாரப்பூர்வமாக வெளியிட்டுள்ளனர். படத்துக்கு ‘அவதார்: ஃபயர் அண்ட் ஆஷ்’ (Avatar: Fire and Ash) என்று தலைப்பு வைத்துள்ளனர். “இதுவரை பார்த்திராத பல பண்டோராவை இதில் பார்ப்பீர்கள். தீவிரமான சாகசத்தையும் முந்தைய பாகத்தை விட அதிகமான உணர்ச்சி வெளிப்பாடுகளையும் இதில் பார்க்க முடியும். விஷுவலாகவும் சிறந்த அனுபவத்தைத் தரும்” என்று கேமரூன் தெரிவித்துள்ளார்.