பிரபல பாலிவுட் நடிகை ஜரீன்கான் கார் மோதி விபத்துக்குள்ளானதில் இளைஞர் ஒருவர் பலியானார்.
இதுகுறித்து போலீஸார் தரப்பில், ”கோவா கடற்கரையின் வடக்குப் பகுதியில் புதன்கிழமையன்று பைக்கில் வந்த இளைஞர் மீது பாலிவுட் நடிகை ஜரீன்கானின் கார் மோதியதில் அவருக்குத் தலையில் பலத்த காயம் ஏற்பட்டது.
இந்நிலையில் மருத்துவமனையில் அனுமதிக்கப்பட்ட அவர் சிகிச்சை பலனின்றி உயிரிழந்தார். மரணம் அடைந்த நபரின் பெயர் நித்தேஷ் கோரல். அவர் வயது 31” என்று தெரிவித்துள்ளனர்.
விபத்து நடந்தபோது நடிகை ஜரீகான் காரில் இருந்ததாகவும், அவரது கார் ஓட்டுநர் அலி அபாஸ் காரை ஓட்டியதகாவும், இந்த விபத்து குறித்து விசாரணை நடந்து வருவதாகவும் போலீஸார் தெரிவித்துள்ளனர்.
ஜரீன்கான் 'வீர்', 'ஹவுஸ்ஃபுல் 2', 'ஹேட் ஸ்டோரி 3' ஆகிய பாலிவுட் படங்களில் நடித்துள்ளார். தமிழில் பிரித்வி ராஜ்குமார் இயக்கத்தில் நகுல் நடித்த 'நான் ராஜாவாகப் போகிறேன்' படத்தில் ஒரு பாடலுக்கு நடனமாடியுள்ளார் என்பது குறிப்பிடத்தக்கது.