தொழிலதிபரை மணக்கிறார் நடிகை ஹன்சிகா - டிச.4-ல் திருமணம்?

நடிகை ஹன்சிகா மோத்வானி, தொழிலதிபரை மணமுடிக்க உள்ளதாகவும், பிரமாண்டமான முறையில் டிசம்பர் 4-ம் தேதி திருமணம் நடக்க இருப்பதாகவும் தகவல் வெளியாகியுள்ளது.

கடந்த 2003-ம் ஆண்டு வெளியான பாலிவுட் படமான 'ஹவா' படத்தின் மூலம் குழந்தை நட்சத்திரமாக அறிமுகமானவர் ஹன்சிகா. தனுஷ் நடிப்பில் வெளியான 'மாப்பிள்ளை' படத்தின் மூலம் தமிழ் சினிமாவில் நாயகியாக அறிமுகமானார். தமிழில் முன்னணி நடிகர்களுடன் நடித்துள்ள ஹன்சிகாவின் 50-வது படமான ‘மஹா’ அண்மையில் வெளியானது.

இந்நிலையில், ஹன்சிகா தனது நீண்ட கால நண்பரும், தொழிலதிபருமான சோஹைல் கதுரியாவை திருமணம் செய்துகொள்ள இருப்பதாக தகவல் வெளியாகியுள்ளது. ஜெய்பூரில் டிசம்பர் 4-ம் தேதி இருவருக்கும் திருமணம் நடைபெற உள்ளதாகவும் கூறப்படுகிறது. திருமண நிகழ்விற்கு நண்பர்கள் மற்றும் நெருங்கிய உறவினர்கள் மட்டும் அழைக்க திட்டமிட்டிருப்பதாக தகவல் வெளியாகியுள்ளது. எனினும், இதை ஹன்சிகா தரப்பு இன்னும் அதிகாரபூர்வமாக உறுதிப்படுத்தவில்லை.