கார்ப்பரேட் டு கலகலப்பு

புதுயுகம் சேனலில் ஒளிபரப்பாகிவரும் ‘ஃபர்ஸ்ட் ஃப்ரேம்’ நிகழ்ச்சி வழியே கோலிவுட் தொடங்கி பாலிவுட் வரைக்கும் கரைத்து குடித்து விடுகிறார் தொகுப்பாளினி பவித்ரா.

‘‘இந்த நிகழ்ச்சி அரை மணிநேரம்தான். ஆனால், கோலிவுட், சமூகதளம், அக்கம்பக்கம், டிரெய்லர் டைம் என 4 பகுதிகளாக ஒளிபரப்பாகும். தமிழ் சினிமா முதல் ஹிந்தி சினிமா வரைக்கும் அப்பப்போ நடக்கிற பொழுதுபோக்கு அம்சங்களை இந்த நிகழ்ச்சி பிரதிபலிக்கும். ரீமேக், பார்ட் 2 என இன்றைக்கு சினிமாவுல நடக்கிற அத்தனை விஷயங்களையும் கலகலப்பாக, எளிதா மக்கள்கிட்ட சேர்க்கிற வேலையைத்தான் செய்றேன்.  2018-ல் கல்லூரி படிப்பை முடிச்சிட்டு 3 மாதம் கார்ப்பரேட் கம்பெனி வேலை. அங்கே இனி உட்காரவே முடியாது என்ற நிலை வந்த அடுத்த நாள் புதுயுகம் சேனலில் ஆடிஷன். வேலையும் கிடைத்தது. இப்போ சமர்த்தாக நிகழ்ச்சியை வழங்கிட்டு வர்றேன்’’ என்கிறார் பவித்ரா உற்சாகமாக.