நயன்தாராவின் ‘இமைக்கா நொடிகள்’ ட்ரெய்லர் ஜூன் 27-ம் தேதி வெளியீடு

நயன்தாரா நடித்துள்ள ‘இமைக்கா நொடிகள்’ படத்தின் ட்ரெய்லர் ஜூன் 27-ம் தேதி வெளியாக இருக்கிறது.

‘டிமான்ட்டி காலனி’ படத்தைத் தொடர்ந்து அஜய் ஞானமுத்து இயக்கியிருக்கும் படம் ‘இமைக்கா நொடிகள்’. நயன்தாரா பிரதான வேடத்தில் நடித்திருக்கும் இந்தப் படத்தில், அவருடைய கணவராக கெஸ்ட் ரோலில் விஜய் சேதுபதி நடித்திருக்கிறார். அதர்வா - ராஷி கண்ணா மற்றொரு ஜோடியாக நடித்திருக்கின்றனர். இயக்குநரும் நடிகருமான அனுராக் கஷ்யப், முக்கிய வேடத்தில் நடித்திருக்கிறார்.

பட்டுக்கோட்டை பிரபாகர் வசனம் எழுதியுள்ள இந்தப் படத்துக்கு, ‘ஹிப் ஹாப் தமிழா’ ஆதி இசையமைத்துள்ளார். ஆர்.டி.ராஜசேகர் ஒளிப்பதிவு செய்ய, புவன் ஸ்ரீநிவாசன் எடிட் செய்துள்ளார். கேமியோ ஃபிலிம்ஸ் சார்பில் சி.ஜே.ஜெயகுமார் இந்தப் படத்தைத் தயாரித்துள்ளார்.

த்ரில்லர் வகையைச் சேர்ந்த இந்தப் படத்தின் ஷூட்டிங், கடந்த 2016-ம் ஆண்டு தொடங்கியது. பெரும்பாலான படப்பிடிப்பு பெங்களூரில் நடைபெற்றுள்ளது. அதர்வாவுக்கு அக்காவாக நயன்தாரா நடித்துள்ள இந்தப் படத்தின் ஷூட்டிங் முடிந்து பல நாட்களாகிறது.

இந்நிலையில், வருகிற 27-ம் தேதி படத்தின் ட்ரெய்லர் மற்றும் பாடல்கள் வெளியிடப்படும் என அதிகாரபூர்வ அறிவிப்பு வெளியாகி இருக்கிறது.