சென்னை: பின்னணி பாடகர் மனோ, தமிழ், தெலுங்கு, மலையாளம், கன்னடம் உட்பட பல்வேறு மொழிகளில் 35 ஆயிரத்துக்கு அதிகமான பாடல்களைப் பாடியிருக்கிறார். இளையராஜா முதல் பல்வேறு இசை அமைப்பாளர்களுடன் பணியாற்றியுள்ள இவர், டி.இமான் இசையில் இதுவரை பாடியதில்லை. இப்போது முதன்முறையாக, ‘லெவன்’ என்ற படத்துக்காகப் பாடியிருக்கிறார்.
நவீன் சந்திரா, ரியா ஹரி நடிப்பில் தமிழ், தெலுங்கில் உருவாகும் புலனாய்வு த்ரில்லர் படம், ‘லெவன்'. அபிராமி, ஆடுகளம் நரேன், திலீபன், ரித்விகா உட்பட பலர் நடிக்கின்றனர். ஏ. ஆர். என்டர்டெயின்மென்ட் தயாரிக்கும் இந்தப் படத்தை லோகேஷ் அஜில்ஸ் இயக்குகிறார். இமான் இசை அமைக்கிறார். கார்த்திக் அசோகன் ஒளிப்பதிவு செய்கிறார்.
"படத்தின் முக்கியமான கட்டத்தில் இடம்பெறும் பாடலை, மனோ பாடினால் நன்றாக இருக்கும் என்று நினைத்தோம். டி.இமானும் மனோவும் முதன்முறையாக இதில் இணைந்ததில் மகிழ்ச்சி. பாடலை கபிலன் எழுதியுள்ளார்” என்றார் லோகேஷ் அஜில்ஸ்.