“இதுவே உங்கள் உச்சமாக இருக்கக் கூடாது” என ‘இந்தியன் 2’ படத்தின் பிரதானக் காட்சிகளைப் பார்த்த பிறகு படத்தின் இயக்குநர் ஷங்கர் குறித்து கமல்ஹாசன் ட்வீட் செய்துள்ளார்.
இது தொடர்பாக அவர் தனது ட்விட்டர் பக்கத்தில், “‘இந்தியன் 2’ படத்தின் பிரதான காட்சிகளை இன்று பார்த்தேன். என் உளமார்ந்த வாழ்த்துகள் ஷங்கர். இதுவே உங்கள் உச்சமாக இருக்கக் கூடாது என்பதும் என் அவா. காரணம், இதுதான் உங்கள் கலை வாழ்வின் மிக உயரமான நிலை. இதையே உச்சமாகக் கொள்ளாமல் திமிறி எழுங்கள். பல புதிய உயரங்கள் தேடி. அன்பன் கமல்ஹாசன்” என பதிவிட்டுள்ளார். மேலும் இயக்குநர் ஷங்கருக்கு வாட்ச் ஒன்றை அணிவிக்கும் புகைப்படத்தையும் பதிவிட்டுள்ளார்.
கடந்த 1996-ல் வெளியான ‘இந்தியன்’ படத்தின் இரண்டாம் பாகம் உருவாகி வருகிறது. ஷங்கர் இயக்கும் இப்படத்தில் கமல்ஹாசன், காஜல் அகர்வால், சித்தார்த், ரகுல் ப்ரீத் சிங், பிரியா பவானி சங்கர், சமுத்திரக்கனி, பாபி சிம்ஹா உட்பட பலர் நடித்து வருகின்றனர். அனிருத் இசையமைக்கிறார்.
இந்தப் படத்தை லைகா நிறுவனம் தயாரித்து வருகிறது. கடந்த 2017-ல் இந்தப் படம் குறித்த அறிவிப்பு வெளியானது. தொடர்ந்து 2019-ல் படப்பிடிப்பு பணிகள் தொடங்கின. இருந்தபோதும் படப்பிடிப்பு தளத்தில் ஏற்பட்ட விபத்து மற்றும் கரோனா பரவல் காரணமாக பணிகள் தள்ளிப்போனது. இந்நிலையில் தற்போது இப்படத்தின் படப்பிடிப்பு விறுவிறுப்பாக நடைபெற்று வருகிறது. அடுத்த ஆண்டு கோடையில் இப்படம் திரைக்கு வரும் என எதிர்பார்க்கப்படுகிறது.