ஒசூர் டாடா எலெக்ட்ரானிக்ஸில் பணியாற்ற கள்ளக்குறிச்சியில் ஆக.26-ல் மகளிர் வேலைவாய்ப்பு முகாம்

கள்ளக்குறிச்சி மாவட்ட மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் வரும் 26-ம் தேதி பிளஸ் 2 தேர்ச்சி பெற்ற பெண்களுக்கான தனியார் வேலைவாய்ப்பு முகாம் நடைபெறவுள்ளது.

தனியார் துறை நிறுவனங்களும் - தனியார் துறையில் பணிபுரிய விருப்பம் உள்ள மனுதாரர்களும் நேரடியாக சந்திக்கும் சிறிய அளவிலான வேலைவாய்ப்பு முகாம்களை கள்ளக்குறிச்சி மாவட்ட வேலைவாய்ப்பு மற்றும் தொழில்நெறி வழிகாட்டும் மையம் மாதத்தின் 2 மற்றும் 4-ம் வெள்ளிக்கிழமைகளில் நடைபெற்று வருகிறது.

அதன்படி, நடப்பு மாதத்தின் 4-ம் வெள்ளிக்கிழமையான வரும் 26-ம் தேதி ஒசூரில் அமைந்துள்ள டாடா எலெக்ட்ரானிக்ஸ் நிறுவனமானது, தங்கள் நிறுவனத்திற்கு பிளஸ் 2 வகுப்பு தேர்ச்சி பெற்ற பெண் வேலைநாடுநர்களை தேர்வு செய்ய உள்ளனர். இந்நிறுவனத்தில் பணிபுரிய 18 முதல் 20 வயதிற்குட்பட்ட 2021-2022 -ம் கல்வி ஆண்டில் பிளஸ் 2 தேர்ச்சி பெற்ற பெண் வேலைநாடுநர்களை தேர்வு செய்ய உள்ளனர்.

26-ம் தேதியன்று கள்ளக்குறிச்சி மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் காலை 9 மணிக்கு இந்நிறுவனத்தின் மூலம் நடைபெறும் சிறப்பு வேலைவாய்ப்பு முகாமில் கலந்து கொண்டு வேலைவாய்ப்பினை பெறலாம் என மாவட்ட ஆட்சியர் ஷ்ரவன் குமார் செய்திக்குறிப்பு ஒன்றில் தெரிவித்துள்ளார்.

தேர்வு செய்யப்படும் வேலைநாடுநர்களுக்கு 3 மாத காலம் பயிற்சி அளிக்கப்படும். மாத ஊதியமாகரூ.15 ஆயிரம் வழங்கப்படும். மேலும் உணவு, தங்குமிடம், போக்குவரத்து வசதியுடன் உயர்கல்வி பயில்வதற்கான வாய்ப்புகளும் இந்நிறுவனத்தால் செய்து தரப்படும் என்றும் ஆட்சியர் தெரிவித்துள்ளார்