ஆகஸ்ட் 31-ம் தேதி நடைபெற உள்ள ஒருங்கிணைந்த தொழில்நுட்பப் பணி தேர்வுக்கான (டிப்ளமா, ஐடிஐ தகுதி) ஹால்டிக்கெட் இணையதளத்தில் பதிவேற்றம் செய்யப்பட்டிருப்பதாக டிஎன்பிஎஸ்சி தெரிவித்துள்ளது.
இதுதொடர்பாக டிஎன்பிஎஸ்சி தேர்வு கட்டுப்பாட்டு அலுவலர் ஏ.சண்முகசுந்தரம் வெளியிட்டுள்ள செய்திக்குறிப்பு: ஒருங்கிணைந்த தொழில்நுட்பப் பணிகளில் (டிப்ளமா மற்றும் ஐடிஐ கல்வித்தகுதி) அடங்கிய பதவிகளுக்கான தேர்வு (தாள்-1) ஆகஸ்ட் 31-ம் தேதி காலை நடைபெற உள்ளது. தேர்வெழுத அனுமதிக்கப்பட்ட விண்ணப்பதாரர்களுக்கு தேர்வுக்கூட அனுமதிச் சீட்டு (ஹால் டிக்கெட்) தேர்வாணையத்தின் இணையதளத்தில் (www.tnpsc.gov.in) பதிவேற்றம் செய்யப்பட்டு இருக்கிறது.
விண்ணப்பதாரர்கள் தங்களின் ஒரு முறை பதிவு தளத்தின் (ஓடிஆர் டேஷ் போர்டு) மூலமாக விண்ணப்ப எண் மற்றும் பிறந்த தேதியை குறிப்பிட்டு ஹால் டிக்கெட்டை பதிவிறக்கம் செய்துகொள்ளலாம். செப்டம்பர் 7 மற்றும் 11 முதல் 18 வரை, 22 முதல் 27-ம் தேதி வரை நடைபெற உள்ள தாள்-2 தேர்வுக்கான (கணினி வழி தேர்வு) ஹால் டிக்கெட் ஆகஸ்ட் 31-ம் தேதி பதிவேற்றம் செய்யப்படும். இவ்வாறு அவர் கூறியுள்ளார்.