புதுடெல்லி: ஹரியானா மாநிலத்தில் புதிய வாகனங்களுக்கு விஐபி அல்லது கவர்ச்சிகரமான பதிவெண்ணைப் பெறுவதற்கான ஏலம் இணைய வழியில் (பரிவாஹன் இணையதளம்) வாரந்தோறும் நடைபெறுகிறது.
கடந்த வாரம் நடைபெற்ற ஏலத்தின் முடிவுகள் நேற்று வெளியானது. இதில், HR 88 B 8888 என்ற பதிவெண் ரூ.1.17 கோடிக்கு ஏலம் போனது. இது நாட்டின் மிகவும் விலை உயர்ந்த பதிவெண் என்ற சாதனை படைத்துள்ளது. முன்னதாக, இந்த பதிவெண் வேண்டி அதிக அளவாக 45 பேர் விண்ணப்பித்திருந்தனர்.
ஏலத்தின் அடிப்படை விலையாக ரூ.50 ஆயிரம் நிர்ணயிக்கப்பட்டது. எனினும் கடும் போட்டி காரணமாக இறுதியில் ரூ.1.17 கோடிக்கு விற்பனையானது. எச்ஆர் என்பது ஹரியானா மாநிலத்தையும், 88 என்பது குறிப்பிட்ட வட்டார போக்குவரத்து அலுவலகத்தையும் பி என்பது வாகன வரிசை எண் குறியீட்டையும் குறிக்கிறது. அதன் பிறகு வரும் 8888 தனித்துவமான எண் ஆகும்.
இதில் சிறப்பு என்னவென்றால், முதலில் உள்ள எச், ஆர் தவிர மற்ற அனைத்தும் 8 ஆக இருப்பதுதான். நடுவில் பி இருந்தாலும், அது ஆங்கில கேப்பிட்டல் எழுத்தில் உள்ள அது 8 போலவே தோன்றுகிறது.
இதற்கு முன்பு கடந்த ஏப்ரல் மாதம் கேரளாவைச் சேர்ந்த கோடீஸ்வரர் வேணு கோபால கிருஷ்ணன், தனது லம்போர்கினி காருக்கு KL 07 DG 0007 (0007 ஜேம்ஸ்பாண்ட் குறியீடு) என்ற பதிவெண்ணை ரூ.45.99 லட்சத்துக்கு ஏலம் எடுத்திருந்தார்.
