சென்னை: இந்தியாவில் அதிக எரிபொருள் சிக்கனத்தை வழங்கும் டிரக் டயரை மிச்செலின் நிறுவனம் அறிமுகம் செய்துள்ளது. இந்த புதிய டயர் நாளை முதல் விற்பனைக்கு வர உள்ளது.
உலகின் முன்னணி டயர் தொழில்நுட்ப நிறுவனமான மிச்செலின், இந்திய நெடுஞ்சாலைகளில் பயன்படுத்துவதற்காக வடிவமைக்கப்பட்டுள்ள ‘MICHELIN X Multi Energy Z2’ என்ற புதிய தலைமுறை டிரக் டயரை சென்னையில் அறிமுகம் செய்துள்ளது. சென்னையில் உள்ள மிச்செலின் நிறுவனத்தின் தொழிற்சாலையில் இவை தயாரிக்கப்படுகின்றன.
இதுகுறித்து மிச்செலின் இந்தியா நிறுவனத்தின் நிர்வாக இயக்குநர் சாந்தனு தேஷ்பாண்டே கூறியதாவது: ஒரு வாகனத்தின் மொத்த இயக்கச் செலவில் எரிபொருள் செலவு சுமார் 50 சதவீதம் பங்களிக்கிறது.
இதை கருத்தில் கொண்டு, இந்திய நெடுஞ்சாலைகளுக்காக உருவாக்கப்பட்டுள்ள இந்த புதிய டயர், அதன் அளவைப் பொருத்து முன்னணி போட்டியாளர்களின் டயர்களுடன் ஒப்பிடும்போது 6 முதல் 13 சதவீதம் வரை எரிபொருள் சேமிப்பை வழங்கும்.
மிச்செலின் நிறுவனத்தின் பிரத்யேக கார்பியான் கலவை தொழில்நுட்பம் மூலம் உருவாக்கப்பட்டுள்ள இந்த டயர், மற்ற டயர்களைவிட 25 சதவீதம் வரை கூடுதல் ஆயுள்காலத்தைக் கொண்டுள்ளது.
இதனால், டயர்களை அடிக்கடி மாற்ற வேண்டி இருக்காது. பராமரிப்புச் செலவும் குறையும். ஈரமான மற்றும் உலர்ந்த சாலைகளில் சிறந்த பிடிப்பை வழங்கும் வகையில் இந்த டயர் வடிவமைக்கப்பட்டுள்ளது. எரிபொருள் சிக்கனத்துடன் சுற்றுச்சூழல் பாதுகாப்பையும் கருத்தில் கொண்டு தயாரிக்கப்பட்டுள்ளது.
இதன்மூலம் வாகன ஓட்டிகள் தங்களது இயக்கச் செலவுகளைக் குறைத்து, உற்பத்தி திறனை அதிகரித்து, லாப வரம்பை வலுப்படுத்த முடியும். இவ்வாறு அவர் கூறினார். இந்த புதிய டயர் நாளை (நவ.1) முதல் விற்பனைக்கு வருகிறது.
நாடு முழுவதும் உள்ள மிச்செலின் டயர்ஸ் அண்ட் சர்வீஸ் கடைகள் மற்றும் அங்கீகரிக்கப்பட்ட சுமார் 300 விற்பனையாளர்களிடம் இந்த டயர் கிடைக்கும் என்று நிறுவனம் தெரிவித்துள்ளது.
