சென்னை: 22 காரட் ஆபரணத் தங்கத்தின் விலை இன்று சென்னையில் பவுனுக்கு ரூ.640 என சரிந்துள்ளது. இதேபோல வெள்ளி விலையும் கிராமுக்கு ரூ.4 என குறைந்துள்ளது.
சர்வதேச பொருளாதார சூழல், அமெரிக்க டாலருக்கு நிகரான இந்திய ரூபாயின் மதிப்பு ஆகியவற்றின் அடிப்படையில், தங்கத்தின் விலை நிர்ணயிக்கப்படுகிறது. அமெரிக்காவில் இறக்குமதி செய்யப்படும் இந்திய பொருட்களுக்கு 50 சதவீதம் வரி விதிப்பு, அமெரிக்க டாலருக்கு நிகரான இந்திய ரூபாயின் மதிப்பின் தொடர் சரிவு உள்ளிட்ட காரணங்களால், தங்கம் விலை உயர்ந்தும், குறைந்தும் வருகிறது.
அந்த வகையில் கடந்த 15-ம் தேதி 22 காரட் ஆபரணத் தங்கம் ஒரு பவுன் ரூ.1,00,120 என வரலாறு காணாத உச்சம் தொட்டு விற்பனையானது. இதன் பின்னர் தங்கம் விலை உயர்ந்தும், குறைந்தும் வருகிறது. வரும் 2026-ம் ஆண்டு தங்கம் விலை கிராமுக்கு ரூ.15,000 வரை நெருங்கும் என தங்க நகை வியாபாரிகள் கணித்துள்ளனர்.
இந்நிலையில், சென்னையில் 22 காரட் தங்கத்தின் விலை இன்று (டிச.29) கிராமுக்கு ரூ.80 குறைந்து, ஒரு கிராம் ரூ.13,020-க்கும், பவுனுக்கு ரூ.640 குறைந்து ஒரு பவுன் ரூ.1,04,160-க்கும் விற்பனை ஆகிறது. சென்னையில் 24 காரட் தங்கம் ஒரு பவுன் ரூ.1,13,632 மற்றும் 18 காரட் தங்கம் ஒரு பவுன் ரூ.86,920-க்கும் விற்பனை ஆகிறது.
இதேபோல வெள்ளி விலையும் இன்று குறைந்துள்ளது. வெள்ளி கிராமுக்கு ரூ.4 குறைந்து, ஒரு கிராம் ரூ.281-க்கும், கிலோவுக்கு ரூ.4,000 குறைந்து, ஒரு கிலோ ரூ.2,81,000-க்கும் சந்தையில் விற்பனை ஆகிறது.
