சிஎல்ஐஆர் நிறுவன நாள் தின கொண்டாட்ட நிகழ்ச்சியில் மத்திய அரசின் தொழில், உள்நாட்டு வர்த்தக மேம்பாட்டுத் துறை செயலர் அமர்தீப் சிங் பாடியா சிஎல்ஆர்ஐ ஆண்டறிக்கையை வெளியிட்டார். அருகில், சிஎல்ஐஆர் டைரக்டர் ஜெனரல் என்.கலைச்செல்வி, சிஎல்ஆர்ஐ இயக்குநர் பி.தணிகைவேலன், ஃபரீதா குழுமத்தின் தலைவர் ரபீக் அகமது, தென்மண்டல தோல் பொருட்கள் ஏற்றுமதி கவுன்சில் தலைவர் அப்துல் வஹாப், சிஎல்ஆர்ஐ மூத்த விஞ்ஞானி மாலதி ஜவஹர் ஆகியோர் உள்ளனர். படம்: ம.பிரபு
சென்னை: மத்திய அறிவியல் மற்றும் தொழில் ஆராய்ச்சி கவுன்சில் (சிஎஸ்ஐஆர்) 85-வது ஆண்டு நிறுவன தின கொண்டாட்ட நிகழ்ச்சி சென்னை அடையாறு மத்திய தோல் ஆராய்ச்சி நிறுவனத்தில் (சிஎல்ஆர்ஐ) நேற்று நடைபெற்றது.
இதில் மத்திய அரசின் தொழில் மற்றும் உள்நாட்டு வர்த்தக மேம்பாட்டுத் துறை செயலர் அமர்தீப் சிங் பாடியா பேசியதாவது: சிஎஸ்ஐஆரின் கீழ் செயல்படும் ஆய்வகங்களில் ஒன்றான சிஎல்ஆர்ஐ நிறுவனத்தில் ஏராளமான தோல் ஆராய்ச்சிகள் நடைபெற்று வருகின்றன. புதிய தொழில்நுட்பங்களும், புதுப்புது தோல் பொருட்களும் உருவாக்கப்பட்டு வருகின்றன.
உலகளவில் தோல் பொருட்கள் தயாரிப்பிலும், நுகர்விலும் இந்தியா 2-ம் இடத்தில் உள்ளது. ஆனால், தோல் பொருள் ஏற்றுமதியில் 12-ம் இடத்தில் இருக்கிறோம். ஐரோப்பிய நாடுகளுடனும், இங்கிலாந்து நாட்டுடனும் இந்தியா தடையற்ற வர்த்தக ஒப்பந்தம் (எப்டிஏ) செய்துள்ளது.
இதன் காரணமாக இந்தியாவில் தோல்பொருட்கள் ஏற்றுமதிக்கு பிரகாசமான வாய்ப்புகள் உள்ளன. ஏற்றுமதியில் 12-வது இடத்திலிருந்து 2-ம் இடத்துக்கு முன்னேறும் அளவுக்கு நம்மிடம் திறன்கள் உள்ளன என்றார்.
சிஎஸ்ஐஆர் டைரக்டர் ஜெனரல் கலைச்செல்வி தலைமை தாங்கி பேசும்போது, “சிஎஸ்ஐஆர் கட்டுப்பாட்டின் கீழ் சிஎல்ஆர்ஐ உள்பட 37 ஆய்வகங்கள் இயங்கி வருகின்றன. 1948-ல் நிறுவப்பட்ட சிஎல்ஆர்ஐ சுதந்திர இந்தியாவில் தொடங்கப்பட்ட முதல் 10 நிறுவனங்களில் ஒன்று என சிறப்பு வாய்ந்தது. இந்நிறுவனம் தனது ஆராய்ச்சி பணிகள் மூலம் சிஎஸ்ஐஆர்-ஐ பெருமைபட வைத்துள்ளது.” என்று குறிப்பிட்டார்.
