அகமதாபாத்: குஜராத் மாநிலம் காவ்டாவில் செயல்பட்டு வரும் தனது பேட்டரி ஆற்றல் சேமிப்பு அமைப்பின் (பிஇஎஸ்எஸ்) திறனை, 6.63 ஜிகாவாட்-ஆக உயர்த்தியுள்ளதாக அதானி கிரீன் எனர்ஜி நிறுவனம் தெரிவித்துள்ளது.
இதுகுறித்து அதானி கிரீன் எனர்ஜி நிறுவனத்தின் செயல் இயக்குநர் சாகர் அதானி கூறியதாவது: குஜராத் மாநிலம் காவ்டாவில் செயல்பட்டு வரும் எங்களுடைய பிஇஎஸ்எஸ் அமைப்பின் சேமிப்புத் திறன் கடந்த 2026 ஜூன் மாதத்தில் 3.55 ஜிகாவாட்டாக இருந்தது. இது கணிசமாக அதிகரிக்கப்பட்டு 6.63 ஜிகாவாட்டை எட்டியுள்ளது. குறிப்பாக, வெறும் 14 மாதங்களில் எட்டப்பட்டுள்ள இந்த சாதனை, எங்கள் நிறுவனத்துக்கும் இந்தியாவின் பசுமை ஆற்றல் மாற்றத்துக்கும் ஒரு முக்கிய மைல்கல்லாக அமையும். நாட்டின் மின் தேவை அதிகரித்து வரும் சூழலில், மின்கட்டமைப்புக்குத் தேவைப்படும் நேரங்களில் சீரான மற்றும் நம்பகமான மின்சாரத்தை வழங்க இந்த அமைப்பு உதவும்.
இந்த சாதனையின் மூலம் இந்தியாவின் மொத்த பேட்டரி சேமிப்புத் திறனான 12.6 ஜிகாவாட்டில், 50 சதவீதத்துக்கும் அதிகமான பங்களிப்பை எங்கள் அதானி கிரீன் எனர்ஜி வழங்குகிறது. இந்த 6.63 ஜிகாவாட் சேமிப்பு அமைப்பைக் கொண்டு, ஒரு நாளைக்குச் சுமார் 20 லட்சம் வீடுகளுக்குத் தேவையான தூய்மையான மின்சாரத்தை வழங்க முடியும். நாக்பூர், பாட்னா அல்லது விசாகப்பட்டினம் போன்ற பெரிய நகரங்களின் உச்சகட்ட மின் தேவையை பல மணி நேரத்துக்கு இதன் மூலம் பூர்த்தி செய்ய இயலும்.
இந்தச் சேமிப்புத் திறனானது, 1,50,000-க்கும் மேற்பட்ட நடுத்தர அளவு மின்சார வாகனங்களின் பேட்டரி திறனுக்கு சமமானது. மேலும், டெல்லி மெட்ரோ ரயிலின் ஒரு நாள் மின் தேவையைப் போல இரு மடங்கு ஆற்றலை இதில் சேமிக்க முடியும்.
2026-27 நிதியாண்டில் கூடுதலாக 10 ஜிகாவாட் பேட்டரி சேமிப்புத் திறனை இணைக்கவும் அடுத்த 5 ஆண்டுகளில் ஒட்டுமொத்த சேமிப்புத் திறனை 50 ஜிகாவாட்டாக உயர்த்தவும் இலக்கு நிர்ணயிக்கப்பட்டுள்ளது. இவ்வாறு அவர் கூறினார்.
