பொருளாதாரம் வேகமாக வளரும்: இந்திய ரிசர்வ் வங்கி தகவல்

புதுடெல்லி: மே மாதத்துடன் ஒப்பிடுகையில் ஜூன் மாதத்தில் இந்தியாவின் பணவீக்கம் சற்று குறைந்துள்ளது. இந்நிலையில், பணவீக்கத்தின் தீவிரம் விரைவில் குறையும் என்றும் இந்தியாவின் பொருளாதாரம் வேகமாக வளரும் என்றும் ரிசர்வ் வங்கி தெரிவித்துள்ளது.

கரோனா ஊரடங்கு தளர்வுக்குப் பிறகு உலக விநியோகக் கட்டமைப்பில் நெருக்கடி ஏற்பட்டது. இதனால், பொருள்களின் விலைவாசி உயர்ந்தது. இந்தச் சூழலை ரஷ்யா - உக்ரைன் போர் இன்னும் தீவிரப்படுத்தியது. கடந்த பிப்ரவரி மாதம் ரஷ்யா - உக்ரைன் இடையே போர் தொடங்கியதையடுத்து, கச்சா எண்ணெய், சமையல் எண்ணெய் விலை உயர்ந்தது.

மேலும், கோதுமை உட்பட அத்தியாவசிய உணவுப் பொருள்களுக்கு கடும் தட்டுப்பாடு ஏற்பட்டது. இதனால் உணவுப் பொருள்களின் விலை கடுமையாக உயர்ந்தது. இதன் விளைவாக சர்வதேச அளவில் பணவீக்கம் உச்சம் தொட்டது.

இந்தியாவில் ஏப்ரல் மாதத்தில் சில்லரை பணவீக்கம் 7.79 சதவீதமாக உச்சம் தொட்டது. பணவீக்கத்தை கட்டுப்படுத்தும் நோக்கில் ரிசர்வ் வங்கி ரெப்போ விகிதத்தை இருமுறை உயர்த்தியது.

இந்தச் சூழலில் ஜூன் மாதத்தில் இந்தியாவின் பணவீக்க நிலவரத்தில் மாற்றம் காணப்பட்டது. மே மாதத்தில் 7.04 சதவீதமாக இருந்த பணவீக்கம் ஜூனில் 7.01 சதவீதமாக குறைந்தது.

அதேபோல் மொத்தவிலை பணவீக்கம் 15.88 சதவீதத்திலிருந்து 15.18 சதவீதமாகக் குறைந்தது. இந்நிலையில் உலகளாவிய நெருக்கடிக்கு மத்தியிலும் இந்தியாவின் பொருளாதாரம் தாக்குப்பிடித்து நிற்பதாக ரிசர்வ் வங்கி குறிப்பிட்டுள்ளது.