மத்திய அரசுக்கு ரூ.1.76 லட்சம் கோடி நிதி வழங்கும் ரிசர்வ் வங்கி: சில முக்கிய தகவல்கள்

புதுடெல்லி

ரிசர்வ் வங்கி கையிருப்பிலிருந்து ரூ.1.76 லட்சம் கோடி உபரி நிதியை மத்திய அரசுக்கு வழங்க ரிசர்வ் வங்கி வாரியக் குழு ஒப்புதல் அளித்துள்ளது. இதுபற்றிய சில முக்கிய தகவல்களை பார்க்கலாம்

* நாட்டின் நிதி நிலையை ஸ்திர நிலையில் வைத்திருக்க மத்திய ரிசர்வ் வங்கி தனது கையிருப்பை வலுப்படுத்தி வரும். ஆனால், தேவையான அளவை விட அதிகமான உபரி நிதி ரிசர்வ் வங்கி வசம் இருக்கிறது.
* கூடுதல் நிதியை அரசுக்கு வழங்கினால் அதனை பயனுள்ள திட்டங்களுக்கு செயல்படுத்த முடியும் என்பதால் அந்த நிதி மத்திய அரசால்கோரப்பட்டது.

* ஆனால் ரிசர்வ் வங்கியின் பணத்தை மத்திய அரசு வாங்குவது அதனை நிதியாதாரத்தையும், செயல்பாட்டையும் முடக்கிவிடும் என்ற அச்சம் சில பொருளாதார நிபுணர்களிடம் காணப்படுகிறது.

* இந்த மோதலால் ரிசர்வ் வங்கியின் ஆளுநர் பதவியில் இருந்து உர்ஜித் படேல் ராஜினாமா செய்தார்.

* இந்த சர்ச்சையை தொடர்ந்து ரிசர்வ் வங்கி முன்னாள் ஆளுநர் பிமல் ஜலான் தலைமையில் குழு அமைக்கப்பட்டது. இந்தக் குழுவும் தனது அறிக்கையைச் சமீபத்தில் ரிசர்வ் வங்கி வாரியக் குழுவிடம் சமர்ப்பித்தது.
* இந்த பரிந்துரையின்பேரில் ரிசர்வ் வங்கியின் பணம் மத்திய அரசிடம் வழங்க ஒப்புதல் அளிக்கப்பட்டது. கையிருப்பு பணம் ரூ.1,76,051 கோடியை மத்திய அரசுக்கு வழங்குவதாக ரிசர்வ் வங்கி தெரிவித்துள்ளது.

* திருத்தப்பட்ட பொருளாதார மூலதன செயல்வரைவின்படி 2018-19 நிதி ஆண்டுக்கான உபரி நிதியாக ரூ.1,23,414 கோடி யும், ரூ.52,637 கோடி கூடுதல் ஒதுக்கீடாகவும் வழங்கப்படுகிறது.

* ரிசர்வ் வங்கி தனது ட்விடண்ட் தொகையில் 28 ஆயிரம் கோடி ரூபாயை கடந்த பிப்ரவரி மாதமே மத்திய அரசுக்கு வழங்கி விட்டது.
* மத்திய அரசின் பொருளாதார சுழற்சி நடவடிக்கைகளுக்கு இந்த நிதி பயன்படும் என நிதியமைச்சகம் நம்பிக்கை தெரிவிக்கிறது.
* பொருளாதார சூழல் மந்தமாக உள்ள நிலையில் சந்தையின் செயல்பாடுகளை ஊக்குவிக்க பல்வேறு துறைகளிலும் அரசே நேரடியாக முதலீடு செய்ய வேண்டும் என்ற கோரிக்கை இருந்து வருகிறது. ரிசர்வ் வங்கியிடம் இருந்து பெறும் பணம் இதற்கு பயன்படுத்தப்படலாம்.

* பொதுத் துறை வங்கிகளுக்கு ரூ.70 ஆயிரம் கோடி ரூபாய் மறுமூலதனம் செய்யப்படுவதாக அரசு அறிவித்தது. ரிசர்வ் வங்கி வழங்கும் இந்த உபரி நிதி வங்கிகளின் மறுமூலதனத்துக்கும் பயன்படுத்தப்பட வாய்ப்புள்ளது.

* பொருளாதார சுணக்கத்தை சீர் செய்ய பல்வேறு நடவடிக்கைகளை மத்திய அரசு மேற்கொண்டு வருகிறது. இதற்காக நிதியமைச்சர் நிர்மலா சீதாராமன் பல்வேறு துறை சார்ந்தவர்களுடன் தொடர்ந்து ஆலோசனை நடத்தி வருகிறார்.