காலாண்டு முடிவுகள்

ஹெக்சாவேர் லாபம் 15% சரிவு

தகவல் தொழில்நுட்ப சேவையில் ஈடுபட்டுள்ள ஹெக்சாவேர் டெக்னாலஜீஸ் நிறுவனத்தின் டிசம்பர் காலாண்டு லாபம் 15 சதவீதம் சரிந்து ரூ. 87 கோடியாக உள்ளது.

முந்தைய ஆண்டு இதே காலத்தில் நிறுவனத்தின் லாபம் 103.2 கோடியாக இருந்தது. நிறுவனத்தின் ஒருங்கிணைந்த வருமானம் 15 சதவீதம் அதிகரித்து ரூ. 711 கோடியாக உள்ளது. முந்தைய ஆண்டு இதே காலத்தில் வருமானம் ரூ. 620 கோடியாக இருந்தது. ரூபாய் மாற்று மதிப்பால் தங்கள் நிறுவனத்துக்கு ரூ. 14.85 கோடி நஷ்டம் ஏற்பட்டதாக நிறுவனத்தின் தலைமைச் செயல் அதிகாரி ஆர். கிருஷ்ணா தெரிவித்துள்ளார்.

ஆதித்ய பிர்லா நுவோ லாபம் ரூ. 368 கோடி

ஆதித்ய பிர்லா நுவோ நிறுவனத்தின் டிசம்பர் காலாண்டு லாபம் 6.62 சதவீதம் அதிகரித்து ரூ. 368 கோடியாக உயர்ந்துள்ளது. முந்தைய ஆண்டு இதே காலத்தில் நிறுவனத்தின் லாபம் ரூ. 345 கோடியாக இருந்தது.

நிறுவனத்தின் நிகர வருமானம் ரூ . 6,539 கோடி யாகும். முந்தைய ஆண்டில் இது ரூ. 6,467 கோடியாக இருந்தது. நிறுவனத்தின் ஒருங்கிணைந்த பிராண்டட் துணி விற்பனை வருமானம் 10 சதவீதம் அதிகரித்து ரூ. 1,349 கோடியாக இருந்தது. ஜவுளி வர்த்தகம் 1.43 சதவீதம் உயர்ந்து ரூ. 331 கோடியாக அதிகரித்தது. தொலைத் தொடர்புத் துறை வருமானம் 11 சதவீதம் உயர்ந்து ரூ. 1,864 கோடியாக அதிகரித்தது.

நஷ்டத்திலிருந்து மீண்டது யுனைடெட் வங்கி

வாராக் கடன் சுமையால் தத்தளிக்கும் யுனைடெட் வங்கி டிசம்பருடன் முடிவடைந்த காலாண்டில் ரூ. 41 கோடி லாபம் ஈட்டியுள்ளது. முந்தைய காலாண்டில் வங்கி எதிர்கொண்ட நஷ்டம் ரூ. 1,238 கோடியாகும்.

வங்கியின் வாராக் கடன் அளவு அதிகரித்துள்ளது. வங்கியின் ஒட்டுமொத்த வாராக் கடன் அளவு 10.82 சதவீதத்திலிருந்து 12.03 சதவீதமாக உயர்ந்துள்ளது.

வங்கியின் மொத்த வருமானம் ரூ. 2,934 கோடியாகும். முந்தைய ஆண்டு இதே காலத்தில் வருமானம் ரூ. 2,986 கோடியாகும்.

நிதி ஆண்டின் 9 மாதங்களில் வங்கியின் ஒட்டுமொத்த வருமானம் ரூ. 1,165 கோடியாகும்.