காலாண்டு முடிவு: விப்ரோ நிகர லாபம் 1.2% உயர்வு

நடப்பு நிதியாண்டின் முதல் காலாண்டு முடிவில் விப்ரோ நிறுவனத்தின் நிகர லாபம் 1.2 சதவீதம் உயர்ந்து ரூ.2,076.7 கோடியாக உள்ளது. கடந்த நிதியாண்டு இதே காலாண்டில் நிறுவனத்தின் நிகர லாபம் ரூ. 2,052 கோடியாக இருந்தது குறிப்பிடத்தக்கது.

ரூ.11,000 கோடி ரூபாய் மதிப்புள்ள பங்குகளை திரும்ப பெறுவதாக விப்ரோ நிறுவனத்தின் இயக்குநர் குழு அறிவித்துள்ளது. மொத்தம் 34.3 கோடி பங்குகள வாங்க முடிவெடுக்கப்பட்டுள்ளது. முதல் காலாண்டில் மொத்த வருமானம் ரூ.14,281 கோடியாக உள்ளது.

அடுத்த காலாண்டில் நிறுவனத்தின் மொத்த வருமானம் 200 கோடி டாலராக இருக்கும் என விப்ரோ நிறுவனம் நம்பிக்கை தெரிவித்துள்ளது. முதல் காலாண்டில் நிறுவனத்தின் வருமானம் 197 கோடி டாலராக இருப்பது குறிப்பிடத்தக்கது. கடந்த ஆண்டு இதே காலாண்டில் இருந்த வருமானத்தை விட 2.1 சதவீதம் அதிகரித்துள்ளது.