அமேசான் நிறுவனத்தின் நிறுவனர் ஜெப் பியோஸ் சர்வதேச பணக் காரர்கள் பட்டியலில் இரண்டாம் இடத்துக்கு முன்னேறி இருக்கிறார். இரண்டாவது இடத்திலிருந்த வாரன் பபெட் மூன்றாம் இடத்துக்கு தள்ளப்பட்டிருக்கிறார்.
துபாயை சேர்ந்த இ-காமர்ஸ் நிறுவனமான Souq.com. நிறு வனத்தை வாங்குவதாக அமேசான் அறிவித்திருக்கிறது. எவ்வளவு தொகைக்கு வாங்கியது என்னும் தகவல் வெளியிடப்படவில்லை. ஆப்பிள் நிறுவனத்துக்கு பிறகு ஐக்கிய அமீரகத்துக்கு செல்லும் இரண்டாவது அமெரிக்க நிறுவனம் அமேசான் ஆகும். இதனால் அமேசான் பங்குகள் 18.32 டாலர் உயர்ந்தது. இதனால் ஒரே நாளில் பியோஸ் சொத்து மதிப்பு 150 கோடி டாலர் உயர்ந்திருக்கிறது. புளூம்பெர்க் குறியீட்டின்படி இவரது தற்போதைய சொத்து மதிப்பு 7,560 கோடி டாலர் ஆகும். இந்த ஆண்டில் மட்டும் 1,070 கோடி டாலர் அளவுக்கு இவரது சொத்து மதிப்பு உயர்ந்திருக்கிறது.
மைக்ரோசாப்ட் நிறுவனர் பில்கேட்ஸ் தொடர்ந்து முதல் இடத்தில் இருக்கிறார். இவரது சொத்து மதிப்பு 8,600 கோடி டாலர்கள். 7,490 கோடி டாலர் சொத்துகளுடன் பெர்க்ஷயர் நிறுவனத்தின் வாரன் பபெட் மூன்றாவது இடத்தில் இருக்கிறார்.
ஸ்பையின் நாட்டை சேர்ந்த அமான்சியோ ஒர்டேகா 7,420 கோடி டாலர் சொத்துகளுடன் நான்காவது இடத்திலும், பேஸ்புக் நிறுவனத்தின் நிறுவனர் மார்க் ஜூகர்பெர்க் 6,140 கோடி டாலர் சொத்துகளுடன் ஐந்தாவது இடத்திலும் இருக்கின்றனர்.