ஸ்டேட் பேங்க் ஆப் இந்தியாவின் (எஸ்பிஐ) ஜூன் காலாண்டு நிகர லாபம் 32 சதவீதம் சரிந்து ரூ.2,521 கோடியாக இருக்கிறது. கடந்த வருடம் இதே காலாண்டில் லாபம் ரூ.3,692 கோடியாக இருந்தது.
நிகர வட்டி வருமானம் 4 சதவீதம் உயர்ந்திருக்கிறது. கடந்த வருடம் ரூ.13,732 கோடியாக இருந்த நிகர வட்டி வருமானம் இப்போது ரூ.14,312 கோடியாக உயர்ந்திருக்கிறது. வாராக்கடனுக்காக ஒதுக்கீடு செய்த தொகை 89 சதவீதம் அதிகரித்து ரூ.6,339 கோடியாக இருக்கிறது. வங்கியின் மொத்த வாராக்கடன் ரூ.1 லட்சம் கோடியை தாண்டியது.
கடந்த வருடம் இதே காலாண்டில் ரூ.56,420 கோடி அளவுக்கு மொத்த வாராக்கடன் இருந்தது. சதவீத அடிப்படையில் 6.94 சதவீதமாக மொத்த வாராக்கடன் இருக்கிறது. நிகர வாராக்கடன் 4.05 சதவீதமாக இருக்கிறது. நேற்றைய வர்த்தகத்தின் முடிவில் இந்த பங்கு 7 சதவீதம் உயர்ந்து 243.30 ரூபாயில் முடிவடைந்தது.