சென்னை: சென்னையில் தங்கம் விலை நேற்று ரூ.97 ஆயிரத்தை தாண்டி, மீண்டும் வரலாறு காணாத புதிய உச்சத்தை தொட்டது.
எச்1பி விசா கட்டணத்தை அமெரிக்க அரசு உயர்த்தியது, அமெரிக்க டாலருக்கு நிகரான இந்திய ரூபாய் மதிப்பு வீழ்ச்சி, வட்டி விகிதத்தை அமெரிக்க ஃபெடரல் வங்கி குறைத்தது, முதலீட்டாளர்களின் பார்வை தங்கத்தின் பக்கம் திரும்பியது உள்ளிட்ட காரணங்களால் தங்கம் விலை தொடர்ந்து உயர்ந்து வருகிறது.
இதன் தொடர்ச்சியாக, நேற்றும் தங்கம் விலை உயர்ந்தது. 22 காரட் தங்கம் நேற்று முன்தினம் ஒரு கிராம் ரூ.11,900, ஒரு பவுன் ரூ.95,200-க்கு விற்கப்பட்ட நிலையில், நேற்று கிராமுக்கு ரூ.300 என பவுனுக்கு ரூ.2,400 உயர்ந்தது. இதனால், நேற்று ஒரு கிராம் ரூ.12,200, ஒரு பவுன் ரூ.97,600 என உயர்ந்து, வரலாறு காணாத புதிய உச்சத்தை தொட்டது.
விரைவில் ஒரு பவுன் தங்கம் ரூ.1 லட்சத்தை தொடும் என்று நகை வியாபாரிகள் தெரிவித்தனர். 24 காரட் தங்கம் விலை நேற்று ரூ.1,06,472 ஆக இருந்தது. நேற்று வெள்ளி விலை கிராமுக்கு ரூ.3 குறைந்து ரூ.203 ஆகவும், கட்டி வெள்ளி கிலோவுக்கு ரூ.3,000 குறைந்து, ரூ.2,03,000 ஆகவும் இருந்தது.