சென்னை: சென்னையில் இன்று (ஜூன் 12) 22 கேரட் ஆபரணத் தங்கம் பவுனுக்கு ரூ.640 உயர்ந்துள்ளது.
சர்வதேச பொருளாதார சூழல், அமெரிக்க டாலருக்கு நிகரான இந்திய ரூபாயின் மதிப்பு உள்ளிட்ட பல்வேறு காரணிகள் தங்கம் விலையை நிர்ணயிப்பதில் முக்கிய பங்கு வகிக்கின்றன. அமெரிக்கா - சீனா இடையே நிலவிய வர்த்தக போர் முடிவுக்கு வந்ததை தொடர்ந்து, தங்கம் விலை கடந்த மே 12-ம் தேதி ரூ.2,360 வரை குறைந்து ரூ.70 ஆயிரத்துக்கு விற்பனை செய்யப்பட்டது.
இதன்பிறகு, தங்கம் விலை ஏற்ற, இறக்கமாக இருந்த நிலையில், மே 28-ம் தேதி முதல் மீண்டும் உயர தொடங்கியது. குறிப்பாக, ஜூன் 2-ம் தேதி பவுனுக்கு ரூ.1,120 உயர்ந்து அதிர்ச்சி அளித்தது. சர்வதேச சந்தையில் தங்கத்தின் தேவை அதிகரிப்பு, அமெரிக்க டாலரின் மதிப்பு உயர்வு ஆகியவை இதற்கு முக்கிய காரணமாக அமைந்தது.
அதன்பின்னர், விலை தொடர்ந்து உயர்ந்து வந்த நிலையில், கடந்த 5-ம் தேதி (ஜூன் 5) ஒரு பவுன் தங்கம் விலை ரூ.73 ஆயிரத்தை தாண்டியது. அன்று 22 காரட் தங்கம் ஒரு கிராம் விலை ரூ.9,130, ஒரு பவுன் விலை ரூ.73,040 ஆக இருந்தது.
தொடர்ந்து தங்கம் விலை உயரும் என்று எதிர்பார்க்கப்பட்ட நிலையில், சென்னையில் ஆபரண தங்கம் விலை குறைந்தது. இந்நிலையில், மீண்டும் தங்கம் விலை ஏறுமுகத்தில் உள்ளது. நேற்றைய தினத்தைத் தொடர்ந்து இரண்டாவது நாளாக இன்றும் தங்கம் விலை ஏற்றம் கண்டுள்ளது.
அதன்படி, சென்னையில் இன்று (ஜூன் 12) 22 கேரட் ஆபரணத் தங்கம் கிராமுக்கு ரூ.80 உயர்ந்து ஒரு கிராம் ரூ.9,100-க்கும், பவுனுக்கு ரூ.640 உயர்ந்து ஒரு பவுன் ரூ.72,800-க்கும் விற்பனையாகிறது. வெள்ளி விலை மாற்றமின்றி ஒரு கிராம் ரூ.119-க்கு விற்பனையாகிறது.
