அனைத்து ஜாப் ஆர்டர்களுக்கும் 5 சதவீத ஜிஎஸ்டி மட்டுமே விதிக்க வேண்டும் என மத்திய நிதிநிலை அறிக்கை தொடர்பான ஆலோசனை கூட்டத்தில், ‘லகு உத்யோக் பாரதி’ அமைப்பினர் வலியுறுத்தியுள்ளனர்.
இதுகுறித்து ‘லகு உத்யோக் பாரதி’ தமிழ்நாடு தலைவர் சிவக்குமார், மாநில பொதுச்செயலாளர் வீரசெழியன் ஆகியோர் வெளியிட்டுள்ள அறிக்கையில் கூறியிருப்பதாவது: மத்திய நிதியமைச்சர் நிர்மலா சீதாராமன் தலைமையில் டிசம்பர் மாதம் நடந்த நிதிநிலை அறிக்கை தொடர்பான ஆலோசனை கூட்டத்தில் ‘லகு உத்யோக் பாரதி’ சார்பில், அகில இந்திய பொதுச் செயலாளர் ஓம் பிரகாஷ் குப்தா மற்றும் அகில இந்திய இணைப் பொருளாளர் மகேஷ் குப்தா ஆகியோர் கலந்து கொண்டனர். இதில் அவர்கள் கூறியதாவது:
தொழில் நிறுவனங்களை பதிவு செய்ய உதவும் ‘உத்யம்’ போர்டலை ஆதாருடன் இணைப்பதன் மூலம் பதிவை எளிமைப்படுத்த முடியும். தனியார் நிறுவனங்கள் மற்றும் உலகளாவிய சந்தைகளுக்கு அரசின் ஆன்லைன் சந்தை (GeM) விரிவாக்கம் செய்ய வேண்டும்.
சர்வதேச வர்த்தக கண்காட்சிகள் மற்றும் தூதரகங்களில் வர்த்தகம் தொடர்பாக உள்ள நடவடிக்கைகளில் குறு, சிறு தொழில் நிறுவனங்களை ஊக்குவிக்க வேண்டும். ஆராய்ச்சி மற்றும் மேம்பாடு பணிகளில் குறு மற்றும் சிறு நிறுவனங்களுக்கு அதிக முக்கியத்துவம் அளிப்பதுடன் நிதி ஒதுக்கீடு செய்ய வேண்டும்.
ஐடிஐ கல்வி முடித்தவர்களுக்கு குறு, சிறு மற்றும் நடுத்தர நிறுவனங்களில் ஒரு ஆண்டு பயிற்சி கட்டாயமாக்கப்பட வேண்டும். வேலை சார்ந்த பயிற்சி பாடத்திட்டங்களை உருவாக்குவதுடன் விரிவுபடுத்த வேண்டும். எளிதாக வணிகம் செய்ய உதவும் வகையில் உரிமங்கள் மற்றும் அனுமதிகளுக்கான ஒற்றைச் சாளர இணக்க தளத்தை செயல்படுத்த வேண்டும்.
பிணையமில்லாத கடன்களை ஊக்குவிக்க வேண்டும். கார்ப்பரேட் நிறுவனங்களுக்கு இணையாக குறு, சிறு நிறுவனங்களுக்கு வட்டி விகிதங்களை குறைக்க வேண்டும்.
தற்போது, குறிப்பிட்ட சில ஜாப் ஆர்டர் சேவைகளுக்கு (ஜவுளி மற்றும் குறிப்பிட்ட உற்பத்தி நடவடிக்கைகள் போன்றவை) மட்டுமே 5 சதவீத ஜிஎஸ்டி விதிக்கப்படுகிறது. அனைத்து ஜாப் ஆர்டர் சேவைகளுக்கும் ஒரே மாதிரியான ஜிஎஸ்டி 5 சதவீதம் அமல்படுத்த வேண்டும்.
ஏற்றுமதியாளர்களுக்கான ஜிஎஸ்டி கடன் பணத்தைத் திரும்பப் பெறுவதை விரைவுபடுத்த வேண்டும். நிலையான நடைமுறைகளுக்கு தனிப்பயன் வரி சலுகைகளை வழங்க வேண்டும். முக்கியமான மூலப்பொருட்களை இறக்குமதி செய்வதற்கான அனுமதி செயல்முறைகளை எளிதாக்க வேண்டும். இவ்வாறு அறிக்கையில் தெரிவிக்கப்பட்டுள்ளது.