Published : 04 Jun 2018 07:02 am

Updated : 04 Jun 2018 07:02 am

 

Published : 04 Jun 2018 07:02 AM
Last Updated : 04 Jun 2018 07:02 AM

பணமதிப்பு நீக்கத்துக்குப் பிறகு 73,000 செயல்படாத நிறுவனங்களின் வங்கிக் கணக்கில் ரூ.24,000 கோடி டெபாசிட்

73-000-24-000

பணமதிப்பு நீக்கத்துக்குப் பிறகு, சுமார் 73,000 செயல்படாத நிறுவனங்கள் ரூ.24,000 கோடி தொகையை தங்களது வங்கிக் கணக்கில் செலுத்தியுள்ளதாக அரசாங்கத் தகவல்கள் தெரிவிக்கின்றன.


கறுப்பு பணம் மற்றும் முறைகேடான சொத்துகளை ஒழிக்கும் நடவடிக்கையாக, தொழில்ரீதியான செயல்பாடுகள் எதிலும் ஈடுபடாத 2.26 லட்சம் நிறுவனங்களின் பெயர்களை கார்ப்பரேட் விவகாரத் துறை அமைச்சகம் வெளியிட்டுள்ளது. இவற்றில் பெரும்பாலான நிறுவனங்களில் சட்டத்துக்கு புறம்பான வகையில் பண பரிமாற்றம் செய்யப்பட்டுள்ளதாகத் தெரிகிறது.

கண்டறியப்பட்டுள்ள 2.26 லட்சம் செயல்படாத நிறுவனங்களில், 1.68 லட்சம் நிறுவனங்களின் வங்கிக் கணக்குகளில் பணமதிப்பு நீக்கத்துக்குப் பிறகு பணம் செலுத்தப்பட்டுள்ளது. இவற்றில் 73,000 செயல்படாத நிறுவனங்கள் ரூ.24,000 கோடியை வங்கிக் கணக்கில் செலுத்தியுள்ளதாகவும், பல்வேறு வங்கிகளில் தொகைகளைச் செலுத்தியுள்ள இந்த நிறுவனங்கள் பற்றிய தகவல்களை திரட்டி வருவதாகவும் கார்ப்பரேட் விவகாரத் துறை அமைச்சகம் தெரிவித்துள்ளது. கடந்த நான்கு ஆண்டுகளில் கார்ப்பரேட் விவகாரத் துறை அமைச்சகம் செய்துள்ள சாதனைகள் குறித்து வெளியிடப்பட்டுள்ள ஆவணத்தில் இந்தத் தகவல்கள் இடம்பெற்றுள்ளன.

68 நிறுவனங்கள் குறித்து விசாரணை நடைபெற்று வருவதாகவும் இந்த ஆவணத்தில் குறிப்பிடப்பட்டுள்ளது. இவற்றில் 19 நிறுவனங்களைத் தீவிர மோசடி விசாரணை அலுவலகமும் ( எஸ்எஃப்ஐஓ), 49 நிறுவனங்களை நிறுவனங்கள் பதிவாளர் அமைப்பும் (ஆர்ஓசி) விசாரித்து வருகின்றன.

கறுப்பு பணத்தை ஒழிக்கும் வகையில் கடந்த 2016-ம் ஆண்டு நவம்பர் மாதம் ரூ.500 மற்றும் ரூ.1,000 பணத்தாள்களின் மதிப்பு நீக்கப்படுவதாக மத்திய அரசு அறிவித்தது.

நிறுவனங்கள் சட்டப்படி, பதிவு செய்யப்பட்ட நிறுவனங்களின் பட்டியலில் இருந்து பல்வேறு காரணங்களின் அடிப்படையில் எந்த நிறுவனத்தையும் நீக்க அரசுக்கு அதிகாரம் உள்ளது குறிப்பிடத்தக்கது.


Sign up to receive our newsletter in your inbox every day!

More From This Category

More From this Author

x