பேங்க் ஆப் பரோடா நிகர லாபம் 36% சரிவு

பேங்க் ஆப் பரோடாவின் இரண்டாம் காலாண்டு நிகர லாபம் 36 சதவீதம் சரிந்து ரூ.355 கோடியாக இருக்கிறது. கடந்த ஆண்டு இதே காலத்தில் ரூ.552 கோடியாக இருந்தது. நிகர வட்டி வருமானம் 8.58 சதவீதம் உயர்ந்து ரூ.3,270 கோடியாக இருக்கிறது.

வங்கியின் வாராக்கடன் நிலைமை சிறிதளவு மேம்பட்டிருக்கிறது. நடப்பு நிதி ஆண்டின் முதல் காலாண்டில் 11.40 சதவீதமாக இருந்த மொத்த வாராக்கடன், இரண்டாம் காலாண்டில் 11.16 சதவீதமாக குறைந்திருக்கிறது. வங்கியின் நிகர வாராக்கடன் 5.46 சதவீதத்தில் இருந்து 5.05 சதவீதமாக சரிந்திருக்கிறது. வங்கியின் மொத்த வருமானம் 3.68% உயர்ந்து ரூ.12,490 கோடியாக இருக்கிறது. கடந்த ஆண்டு இதே காலத்தில் ரூ.12,047 கோடியாக இருந்தது. வங்கியின் மொத்த வணிகம் 9.71 லட்சம் கோடியாக இருக்கிறது. இதில் டெபாசிட்களின் பங்கு ரூ.5.83 லட்சம் கோடியாகும். நேற்றைய வர்த்தகத்தில் இந்த பங்கு 1.31% உயர்ந்து முடிந்தது.