அமெரிக்க நாவலாசிரியர்
உலகப் புகழ்பெற்ற அமெரிக்க நாவலாசிரியர் மார்க் ட்வைன் (Mark Twain) பிறந்த தினம் இன்று (நவம்பர் 30). அவரைப் பற்றிய அரிய முத்துக்கள் பத்து:
* அமெரிக்காவின் ஃபுளோரிடா மாகாணம், மிஸோரியில் பிறந்தவர் (1835). இவரது இயற்பெயர், சாமுவேல் லாங்ஹோன் கிளெமென்ஸ். தந்தை, வணிகர். 11 வயதில் தந்தை இறந்ததால், பள்ளியிலிருந்து வெளியேறி ஒரு பிரின்ட்டரிடம் உதவியாளராகச் சேர்ந்தார். நீராவிப் படகு கேப்டனாக இரண்டாண்டுகள் பணிபுரிந்தார்.
* அப்போதுதான் ‘மார்க் ட்வைன்’ எனக் குறிப்பிடப்பட்டார். இதையே பின்னாளில் தனது புனைப்பெயராக சூட்டிக்கொண்டார். 18 வயதில் நியூயார்க் சென்றார். அங்கும் ஃபிலடல்பியா, செயின்ட் லூயிஸ், சின்சினாட்டி ஆகிய இடங்களிலும் அச்சகராகப் பணியாற்றினார்.
* தவறாமல் நூலகம் சென்று அறிவியல் உள்ளிட்ட பல்வேறு விஷயங்கள் குறித்த நூல்களை வாசித்து அறிவை வளர்த்துக் கொண்டார். இயல்பாகவே நகைச்சுவை உணர்வும் பெற்றிருந்தார். வெர்ஜீனியாவில் வெளியிடப்பட்ட ‘டெரிடோரியல் என்டர்பிரைஸ்’ என்ற பத்திரிகையில் 1863-ல் ‘லெட்டர் ஃபிரம் கார்சன்’ என்ற பயணக்கட்டுரை எழுதினார்.
* 1865-ல் ‘தி செலிபிரேடட் ஜம்ப்பிங் ஃபிராக் ஆஃப் கேலவெரஸ் கவுன்டி’ என்ற நகைச்சுவைக் கதை வெளிவந்தது. இந்தச் சிறுகதை சர்வதேச கவனத்தைப் பெற்றது. கிரேக்க மொழியிலும் மொழிபெயர்க்கப்பட்டது. ‘சக்ரமென்டே யூனியன்’ என்ற பத்திரிகையில் இவர் எழுதிய கட்டுரைகள் தேசிய அளவில் மிகவும் பிரபலமடைந்தன.
* நகைச்சுவையும் நையாண்டியும் கலந்த இவரது எழுத்தும், பேச்சும் உலகம் முழுவதும் வாசகர்களைப் பெற்றுத் தந்தது. 1867-ல் உள்ளூர் பத்திரிகைக்காக ஐரோப்பிய மற்றும் மத்திய கிழக்கு நாடுகளுக்குப் பயணம் மேற்கொண்டார். அந்தப் பயண அனுபவங்களைக் கட்டுரைகளாக எழுதினார். இவை தொகுக்கப்பட்டு ‘தி இன்னொசன்ஸ் அப்ராட்’ என்ற நூலாக வெளிவந்தது.
* ‘பஃபெல்லோ எக்ஸ்பிரஸ்’ என்ற பத்திரிகையின் ஆசிரியராகப் பணியாற்றினார். 1872-ல் ‘ரஃபிங் இட்’ என்ற நூல் வெளிவந்தது. 1874 முதல் 1891 வரையிலான காலகட்டத்தில் நாவல்கள், சிறுகதைகள், கட்டுரைகள் என ஏராளமாக எழுதினார்.
* 1876-ல் வெளிவந்த ‘தி அட்வென்சர்ஸ் ஆஃப் டாம் சாயர்’, 1881-ல் வெளிவந்த ‘லைஃப் ஆன்தி மிஸிசிப்பி’ 1885-ல் வெளிவந்த ‘தி அட்வென்சர்ஸ் ஆஃப் ஹக்கிள்பெரி ஃபின்’, ‘ஏ டிராம்ப் அப்ராட்’ ஆகிய இவரது படைப்புகள் உலகப் புகழ்பெற்றவை. லண்டன் சென்ற இவர், அறிவியல் ஆராய்ச்சிகளில் மிகுந்த ஆர்வம் கொண்டார்.
* தனது விஞ்ஞான நண்பருடன் இணைந்து ‘இம்ப்ரூவ்மன்ட் இன் அட்ஜஸ்டபிள் அன்ட் டிடாசபிள் ஸ்ராப்ஸ் ஃபார் கார்மென்ட்ஸ்’ உள்ளிட்ட சில சாதனங்களை உருவாக்கினார். தனது எழுத்து மூலம் சம்பாதித்த பணத்தை எல்லாம், கண்டுபிடிப்புகளுக்கும் பல தொழில்நுட்பங்களைக் கண்டறிவதற்கும் செலவிட்டார். மேலும் இவர் தொடங்கிய பதிப்பகமும் நஷ்டமடைந்ததால் கடனாளியானார்.
* பின்னர் உலகம் முழுவதும் பல்வேறு இடங்களில் உரையாற்றியும், எழுதியும் ஈட்டிய வருமானத்தைக் கொண்டு கடன்களை அடைத்தார். 1908-ல் சிறுமிகளுக்கான ‘ஏஞ்சல் ஃபிஷ் அன்ட் அக்குவேரியம் கிளப்’ (Angel Fish and Aquarium Club) என்ற அமைப்பை உருவாக்கினார்.
* பிரபல அமெரிக்க எழுத்தாளர், வில்லியம் ஃபோக்னர், இவருக்கு ‘அமெரிக்க இலக்கியத்தின் தந்தை’ என்று புகழாரம் சூட்டியுள்ளார். அமெரிக்காவின் தலைசிறந்த நகைச்சுவைப் படைப்பாளிகளில் ஒருவரான மார்க் ட்வைன், 1910 ம் ஆண்டு, 75வது வயதில் மறைந்தார்.