அதா யோனத் 10

அதா யோனத் - நோபல் பரிசு பெற்ற இஸ்ரேல் ஆராய்ச்சியாளர்

நோபல் பரிசு பெற்ற இஸ்ரேல் ஆராய்ச்சியாளரும், பேராசிரியருமான அதா யோனத் (Ada Yonath) பிறந்த தினம் இன்று (ஜூன் 22). அவரைப் பற்றிய அரிய முத்துக்கள் பத்து:

* இஸ்ரேலின் ஜெருசலேம் நகரில் (1939) பிறந்தார். மளிகைக் கடை நடத்திய தந்தை, மோசமான உடல்நிலை காரணமாக அவ்வப் போது மருத்துவமனையில் சிகிச்சை பெற்றுவந்தார். இதனால் போதிய வருமானம் ஈட்ட முடியவில்லை. ஆனாலும், மகளுக்கு நல்ல கல்வியை அளிப்பதில் பெற்றோர் உறுதியாக இருந்தனர்.

* தரமான பள்ளியில் ஆரம்பக் கல்வி கற்றார். 4 அறைகள் கொண்ட வாடகை வீட்டில் மேலும் 2 குடும்பத்துடன் இவர்களது குடும்பம் வசித்தது. வறுமை வாட்டிய சூழலில் புத்தகங்கள் மட்டுமே இவரது பொழுதுபோக்கு. அறிவை ஈட்டுவதற்கான ஆதாரங்களும் அவைதான்.

* தந்தை காலமானதும், படிப்பைத் தொடர்ந்துகொண்டே சிறு சிறு வேலைகள் பார்த்து, அம்மாவுடன் சேர்ந்து குடும்ப பாரத்தை சுமக்கத் தொடங்கினாள் சிறுமி. பிறகு, அம்மாவின் சகோதரிகள் வசிக்கும் டெல்அவிவ் நகருக்கு குடிபெயர்ந்தனர்.

* பள்ளிப் படிப்பை முடித்து, கட்டாய ராணுவ சேவையில் ஈடுபட்டார். மருத் துவப் பிரிவில் பணியாற்றியவர் மருந்துகள், நோய், மருத்துவப் பிரச்சினைகள் குறித்து நிறைய விஷயங்களைத் தெரிந்துகொண்டார்.

* ஜெருசலேமில் உள்ள ஹீப்ரூ பல்கலைக்கழகத்தில் வேதியியலில் இளங்கலைப் பட்டம் பெற்றார். உயிரி வேதியியலில் முதுகலைப் பட்டம் பெற்றார். வெய்ஸ்மான் கல்வி நிறுவனத்தில் எக்ஸ்ரே படிகவியலில் முனைவர் பட்டம் பெற்றார். கொலோஜென் புரோட்டீன் பொருளின் வடிவமைப்பு குறித்து ஆராய்ந்தார்.

* பிட்ஸ்பர்க், பென்சில்வேனியாவில் உள்ள பிரபல ஆய்வுக்கூடங்களில் பல ஆய்வுகளை மேற்கொண்டார். பிறகு மசாசூசெட்ஸ் இன்ஸ்டிடியூட் ஆஃப் டெக்னாலஜியில் (எம்ஐடி) ஆய்வுகளில் ஈடுபட்டார். சிகாகோ பல்கலைக்கழகத்தில் வருகைதரு பேராசிரியராகப் பணிபுரிந்தார்.

* மீண்டும் வெய்ஸ்மான் திரும்பியவர், இஸ்ரேலின் முதல் உயிரியியல் படிகவியல் ஆய்வகத்தை முன்னின்று தொடங்கிவைத்தார். செல்களில் புரத உற்பத்தி அமைப்பு மற்றும் எதிர்உயிரிகளால் அவற்றில் ஏற்படும் மாற்றங்கள் குறித்து ஆய்வு மேற்கொண்டார். ரிபோசோம் செல்களுக்குள் புரதங்கள் உற்பத்தியாவது தொடர்பாக ஆய்வு நடத்தினார்.

* தாக்கும் நோய்க் கிருமிகளிடம் இருந்து ரிபோசோம்களை ஆன்டிபயாடிக் மருந்துகள் எவ்வாறு பாதுகாக்கின்றன என்று கண்டறிந்தார். 20 ஆண்டுகால கடுமையான உழைப்பில் இதை சாதித்தார். இவரது கண்டுபிடிப்புகள் சக்திமிக்க ஆன்டிபயாடிக் மருந்துகள் உற்பத்தி செய்ய வழிவகுத்தன.

* இஸ்ரேல் அறிவியல் அகாடமி, அமெரிக்க தேசிய அறிவியல் அகாடமி ஆகியவற்றின் உறுப்பினராக 2000-ல் தேர்ந்தெடுக்கப்பட்டார். ரிபோசோம்களின் வடிவமைப்பு மற்றும் செயல்பாடுகள் குறித்த ஆராய்ச்சிகளுக்காக, வெங்கட்ராமன் ராமகிருஷ்ணன், தாமஸ் ஸ்டெய்ஸ் ஆகிய இருவருடன் இணைந்து வேதியியலுக்கான நோபல் பரிசை 2009-ம் ஆண்டு பெற்றார்.

* நோபல் பரிசு பெற்ற முதல் இஸ்ரேலியப் பெண் என்ற பெருமைக்கு உரியவர். இதுதவிர, ஏராளமான பரிசுகள், விருதுகளைப் பெற்றுள்ளார். இன்று 78-வது வயதில் அடியெடுத்து வைக்கும் அதா யோனத், தற்போது வெய்ஸ்மான் கல்வி நிறுவனத்தின் கட்டுப்பாட்டில் உள்ள ‘ஹெலன் அண்ட் மில்டன்’ உயிரியல் மூலக்கூறு கட்டமைப்பு ஆய்வு மையத்தின் இயக்குநராகப் பணியாற்றி வருகிறார்.