மகாதேவ தேசாய் 10

விடுதலைப் போராட்ட வீரரும் மகாத்மா காந்தியின் நம்பிக்கைக்குரிய செயலாளருமான மகாதேவ தேசாய் (Mahadev Desai) பிறந்த தினம் இன்று (ஜனவரி 1). அவரைப் பற்றிய அரிய முத்துக்கள் பத்து:

* குஜராத் மாநிலம் சூரத் அடுத்த சரஸ் என்ற கிராமத்தில் (1892) பிறந்தவர். தந்தை ஆசிரியர். இளம் வயதிலேயே அறிவுக்கூர்மை மிக்க மாணவராக விளங்கினார் மகாதேவ். 7 வயதில் தாயை இழந்தார்.

* தந்தைக்கு அவ்வளவாக வசதி யில்லை என்பதால், உதவித்தொகை பெற்றுப் படித்தார். 1910-ல் பம்பாய் கல்லூரியில் பி.ஏ. பட்டம் பெற்றார். அசாதாரண நினைவாற்றல், அபார புத்திக்கூர்மை கொண்டிருந்தார். இவரது கையெழுத்து மிகவும் அழகாக இருக்கும்.

* குஜராத் இலக்கியங்களை ஆர்வத்துடன் படித்தார். ராமாயணம், மகாபாரதம், கீதை, உபநிடதங்கள் கற்றார். 1913-ல் சட்டப் படிப்பில் பட்டம் பெற்று, சிறிதுகாலம் வழக்கறிஞர் தொழில் செய்தார். பின்னர் அரசு வங்கியில் பணியாற்றினார். அங்கு நடக்கும் முறைகேடுகளைப் பார்த்து வெறுத்துப்போய் அந்த வேலையை விட்டார்.

* மகாத்மா காந்தியை 1917-ல் சந்தித்தார். அவரது கொள்கைகளால் கவரப்பட்டார். அலகாபாத் சென்றவர் அங்கு மோதிலால் நேரு நடத்திய ‘இன்டிபென்டன்ட்’ இதழ் வெளியீட்டில் அவருக்கு உதவியாக இருந்தார். 1923-ல் மீண்டும் அகமதாபாத் வந்து, ‘நவஜீவன்’ பத்திரிகையைக் கொண்டுவர காந்திஜிக்கு உதவியாக இருந்தார்.

* சம்பாரண் சத்தியாக்கிரகம், பார்தோலி சத்தியாக்கிரகம், உப்பு சத்தியாக்கிரகம் உள்ளிட்ட பல போராட்டங்களில் கலந்துகொண்டு பலமுறை சிறை சென்றார். 1924 முதல் 1928 வரை காந்திஜி மேற்கொண்ட பாரத் யாத்ராவில் அவருடன் சென்றார். 1931-ல் லண்டனில் நடைபெற்ற வட்டமேஜை மாநாட்டுக்கும் அவருடன் சென்றார்.

* தினமும் மைல் கணக்கில் நடப்பார். ஆனாலும், படிப்பது, எழுதுவது, அன்றாடப் பணிகள் என எதையும் மிச்சம் வைக்கமாட்டார். கட்டுரைகளும் எழுதிவந்தார். காந்திஜியும் கஸ்தூரிபா காந்தியும் இவரைத் தங்கள் மகனாகவே கருதினர்.

* காந்திஜியின் தனிச்செயலாளர் என்ற முறையில் அவருக்கு மட்டுமல்லாமல் தன்னைச் சுற்றியுள்ள அனைவருக்கும் சேவை செய்தார். கூட்டுவது, துணி துவைப்பது, சமைப்பது, உணவு பரிமாறுவது, நோயாளிகளை கவனிப்பது, கற்றுக்கொடுப்பது என சகல பணிகளையும் முழு மகிழ்ச்சியுடன் செய்துவந்தார்.

* குஜராத்தி, சமஸ்கிருதம், வங்கமொழி, இந்தி, மராத்தி, ஆங்கிலம் ஆகிய மொழிகளை நன்கு அறிந்திருந்தார். ஏராளமான நூல்களை எழுதியுள்ளார். இவர் பல ஆண்டுகாலமாக அன்றாடம் எழுதிவந்த நாட்குறிப்புகள் தொகுக்கப்பட்டு, ‘மகாதேவ் பாய் கீ டைரி’ என்ற பெயரில் 8 பகுதிகளாக வெளிவந்தன. இதில் காந்திஜியின் அன்றாட செயல்பாடுகள், வாழ்க்கைமுறை குறித்து விரிவாக எழுதியுள்ளார். இந்த நூல்கள் இவரது மறைவுக்குப் பின்னரே வெளியிடப்பட்டன.

* 1942-ல் வெள்ளையனே வெளியேறு இயக்கத்தில் கலந்துகொண்டதால், வீட்டுச்சிறையில் அடைக்கப்பட்டார். காந்தியடிகளின் நிழலாக, நம்பிக்கைக்குப் பாத்திரமான உற்ற துணையாக, செயலாளராக, அவரது வாழ்க்கைமுறை குறித்த அதிகாரப்பூர்வ எழுத்தாளராக 25 ஆண்டுகாலம் இருந்தார்.

* சிறந்த எழுத்தாளர், சிந்தனையாளர் எனப் போற்றப்பட்ட மகாதேவ தேசாய் சிறையிலேயே மாரடைப்பால் 50-வது வயதில் (1942) மறைந்தார். ‘இவர் ஒருவர் செய்யும் பணிகளை அரை டஜன் செயலாளர்களால்கூட செய்ய முடியாது. 100 வயது வாழ்ந்தவர் செய்யும் பணியை இவர் செய்திருக்கிறார், என்று காந்திஜி இவருக்குப் புகழாரம் சூட்டியுள்ளார்.