Published : 11 Feb 2015 18:21 pm

Updated : 11 Feb 2015 18:22 pm

 

Published : 11 Feb 2015 06:21 PM
Last Updated : 11 Feb 2015 06:22 PM

நின்றார் மிஸ்பா; வென்றது பாகிஸ்தான்: இங்கிலாந்து தோல்வி

சிட்னியில் நடைபெற்ற உலகக்கோப்பை பயிற்சி ஆட்டத்தில் மிஸ்பா, உமர் அக்மல் முக்கிய கூட்டணி அமைக்க இங்கிலாந்தை 4 விக்கெட்டுகள் வித்தியாசத்தில் வீழ்த்தியது பாகிஸ்தான்.

டாஸ் வென்ற இங்கிலாந்து கேப்டன் இயன் மோர்கன் முதலில் பேட் செய்ய முடிவெடுக்க, இங்கிலாந்து அணி பாகிஸ்தானின் இறுக்கமான பந்துவீச்சில் 50 ஓவர்களில் 8 விக்கெட்டுகளை இழந்து 250 ரன்களை மட்டுமே எடுத்தது. இலக்கைத் துரத்திய பாகிஸ்தான் 78/4 என்று திணறிய போது கேப்டன் மிஸ்பா உல் ஹக் (91 ரன்கள், 99 பந்து, 5 பவுண்டரி 2 சிக்சர்), உமர் அக்மல் (65 ரன்கள், 66 பந்து, 3 பவுண்டரி, 3 சிக்சர்) முக்கியக் கூட்டணி அமைக்க, 48.2 ஓவர்களில் 6 விக்கெட்டுகள் இழப்புக்கு 252 ரன்கள் எடுத்து வெற்றி பெற்றது.

முதலில் பேட் செய்த இங்கிலாந்து அணி, தொடக்கத்தில் சொஹைல் கான், ஈஷான் ஆதில் ஆகியோரது துல்லியமான, குட் லெந்த் பந்துவீச்சில் விரைவு ரன்களைக் குவிக்க முடியவில்லை.

2-வது ஓவரில் ஈஷான் ஆதில் பந்தை மொயீன் அலி லெக் திசையில் திருப்பி விட நினைத்தார். ஆனால் மட்டையை சற்றே முன்னதாக திருப்ப பந்து மட்டையின் வெளிவிளிம்பில் பட்டு ஷாட் கவரில் எளிதான கேட்சை யூனிஸ் கான் பிடிக்க 4 ரன்களில் வெளியேறினார்.

அதன் பிறகு கேரி பாலன்ஸ் களமிறங்கி 15 பந்துகளில் 1 ரன்னையே எடுக்க முடிந்தது. ஆனால் அவர் பதட்டமடையவில்லை. அவர் 81 பந்துகளில் 57 ரன்களை 4 பவுண்டரிகளுடன் எடுத்து நிலைப்படுத்தினார். அதிரடிக்காக இறக்கி விடப்பட்ட அலெக்ஸ் ஹேல்ஸும் துல்லியமான பந்து வீச்சை அடித்து ஆட முடியவில்லை. அவரும் முயற்சி செய்யவில்லை. கடைசியில் அவர் 47 பந்துகளில் 31 ரன்கள் எடுத்து ஷாகித் அஃப்ரீடி பந்தில் ஆட்டமிழந்தார்.

ஹேல்ஸும், பேலன்சும் 2-வது விக்கெட்டுக்காக 64 ரன்களைச் சேர்க்க, பேலன்சும், ஜோ ரூட்டும் இணைந்து 66 ரன்களை 3-வது விக்கெட்டுக்காக 12 ஓவர்களில் சேர்த்தனர்.

பேலன்ஸை 57 ரன்களில் யாசிர் ஷா என்ற லெக்ஸ்பின்னர் வீழ்த்த, கேப்டன் மோர்கனின் மோசமான பார்ம் தொடர்ந்தது. அதே ஓவரின் 4-வது பந்தில் ரன் எடுக்காமல் அவுட் ஆனார். பிறகு பொபாராவையும் (11) யாசிர் ஷா வீழ்த்த இங்கிலாந்து 35-வது ஓவர் முடிவில் 157/5 என்று சரிவின் விளிம்பில் இருந்தது.

ஜோஸ் பட்லர் 13 ரன்களில் சோஹைல் கான் பந்தில் பவுல்டு ஆனார். ஆனால் அதன் பிறகு ரூட், கிறிஸ் ஜோர்டான் இணைந்து 8 ஓவர்களில் 64 ரன்களை 7-வது விக்கெட்டுக்காகச் சேர்த்தனர். ஜோ ரூட் 89 பந்துகளில் 4 பவுண்டரி 1 சிக்சருடன் 85 ரன்களை அதிகபட்சமாக எடுத்தார். இங்கிலாந்து 250 ரன்களை ஒருவழியாகச் சேர்த்தது.

பாகிஸ்தான் தரப்பில் லெக் ஸ்பின்னர் யாசிர் ஷா 45 ரன்களுக்கு 3 விக்கெட்டுகள் என்று இங்கிலாந்து மிடில் ஆர்டரை வெளியேற்றினார். அப்ரீடி தொடக்கத்தில் சிக்கனமாக வீசினாலும் பின்னர் ரன்களை கசியவிட்டு 59 ரன்களைக் கொடுத்தார்.

மிஸ்பா உல் ஹக், உமர் அக்மல் ஜோடியின் வெற்றிக் கூட்டணி:

இலக்கைத் துரத்தக் களமிறங்கிய பாகிஸ்தான் அணி தொடக்கத்தில் ஜேம்ஸ் ஆண்டர்சன், பிராடின் வேகம் மற்றும் ஸ்விங்கிற்குத் தடுமாறினர். நசீர் ஜாம்ஷெட் 1 ரன் எடுத்து பிராடின் வைடு பந்தை கால்களை நகர்த்தாமல் விளையாடி எட்ஜ் செய்து டிரெட்வெல்லிடம் 2-வது ஸ்லிப்பில் கேட்ச் கொடுத்து வெளியேறினார்.

அடுத்த படியாக அகமது ஷேஜாத் 2 ரன்களில் இருந்த போது ஆண்டர்சனின் கிளாசிக் அவுட் ஸ்விங்கருக்கு ஷேஜாத் வழக்கமான பாணியில் தொட அது மீண்டும் டிரெட்வெல்லிடம் கேட்ச் ஆனது.

யூனிஸ் கான் 40 பந்துகள் விளையாடி 2 பவுண்டரிகளுடன் 19 ரன்கள் எடுத்த நிலையில் ஜோர்டான் வீசிய ஷாட் பிட்ச் பந்தை புல் ஷாட் ஆடி கேரி பாலன்ஸின் அபார கேட்சிற்கு அவுட் ஆக, பாகிஸ்தான் 14-வது ஓவரில் 43/3 என்று ஆனது. அதன் பிறகு ஹாரிஸ் சோஹைல், மிஸ்பா இணைந்து ஸ்கோரை மெதுவே 78 ரன்களுக்கு உயர்த்தினர், இதில் ஹாரிஸ் சோஹைல் 33 ரன்கள் எடுத்து டிரெட்வெல் ஆஃப் ஸ்பின்னை லாங் ஆனில் நேராக கேட்ச் கொடுத்து வெளியேறினார்.

அதன் பிறகு உமர் அக்மல், மிஸ்பாவுடன் இணைந்து 22 ஓவர்களில் 133 ரன்களைச் சேர்த்தனர். உமர் அக்மல் 65 ரன்களில் வெளியேற ஸ்கோர் 211/5 என்று பாதுகாப்பை எட்டியது. சோஹைப் மக்சூத் 20 ரன்கள் எடுக்க மிஸ்பா ஒரு கேப்டனுக்கான பொறுப்பும், நிதானமும் காண்பித்து அணியை வெற்றிக்கு இட்டுச் சென்றார்.

பாகிஸ்தான் வெற்றிஇங்கிலாந்துசிட்னிஉலகக்கோப்பை பயிற்சி ஆட்டம்இந்தியாகிரிக்கெட் மிஸ்பா உல் ஹக்ஜோ ரூட்

You May Like

More From This Category

More From this Author