டி.கார்த்திக்
karthikeyan.di@hindutamil.co.in
தமிழகத்தில் தேர்தல் களம் சூடுபிடிக்கத் தொடங்கிவிட்டது. அதிமுக கூட்டணியில் பாஜகவும் பாமகவும் தரும் அழுத்தங்கள் காரணமாக, அந்தக் கட்சிகளின் தொகுதிப் பங்கீடு பெரும் எதிர்பார்ப்பைக் கிளப்பியிருக்கிறது. இந்தப் பரபரப்புக்கு மத்தியில், அதிமுக கூட்டணி பங்கீடு தொடர்பாகத் தொடர்ந்து பல்வேறு தகவல்கள் வெளிவந்த வண்ணம் உள்ளன.
திமுக கூட்டணியைப் போலவே, அதிமுக கூட்டணியிலும் கடந்த மக்களவைத் தேர்தலில் இடம்பெற்ற கட்சிகளில் பெரும்பாலானவை அந்தக் கூட்டணியில் இடம்பெறுவது உறுதியாகிவிட்டது. தொகுதிப் பங்கீடுகள் தொடர்பாகத்தான் இன்னமும் இறுதி முடிவு எட்டப்படவில்லை.
பாஜகவின் பகீரதப் பிரயத்தனம்
என்னதான் மத்தியில் வலிமையான ஆளுங்கட்சியாக இருந்தாலும், தமிழகத்தைப் பொறுத்தவரை ‘நோட்டா’வுடன் போட்டியிடும் கட்சி என்ற கிண்டலுக்கு பாஜகவால் இன்னும் பதில் சொல்ல முடியவில்லை. அந்த அவப்பெயரைத் துடைக்க தொடர்ந்து பிரபலங்களைக் கட்சியில் இணைப்பது, பிற கட்சியிலிருந்து ஆட்களைப் பிடிப்பது, பேரணி, யாத்திரை என பாஜக முன்பைவிட தமிழகத்தில் பிஸியாக உள்ளது.