உதயசூரியன், சன் ஆஃப் கலைஞர்- மதுரையில் ஒரு கருணாநிதி குடும்பம்!

கே.கே.மகேஷ்

வாக்காளர் பட்டியலில் பெயர் இருக்கிறதா என்று சரி பார்க்கப் போன இடத்தில் ஓர் ஆச்சரியம். மதுரை ஒத்தக்கடை வாக்குச்சாவடியில் வாக்களிப்போர் பட்டியலில், ‘தயாளு, க/பெ. கலைஞர்’ என்ற பெயர் இருந்தது. கூடவே, கலைஞர், தமிழரசு, கனிமொழி, செல்வி உள்ளிட்ட கலைஞர் குடும்பத்தின் மற்ற பெயர்களும் இருக்க... அந்தக் குடும்பத்தைப் பார்த்தே ஆகவேண்டும் என்ற ஆர்வம் ஏற்பட்டுவிட்டது.

ஒத்தக்கடை அருகே இருக்கும் வௌவால் தோட்டத்தில் இறங்கி, “இங்க கலைஞர் வீடு எங்கே இருக்கு?” என்று விசாரித்தேன். முதலில் சந்தித்த பெண்மணியே சொல்லிவிட்டார், “விவசாய கல்லூரி ஊழியர் குடியிருப்புல ஓட்டு வீடு பகுதிக்குப் போங்க...” என்று.

விவசாய கல்லூரி ஊழியர் குடியிருப்புகளில் மிகமிக வசதிக்குறைவான, சின்னச்சின்ன ஓட்டு வீடுகளைக் கொண்ட பகுதியில் இருந்தது கலைஞரின் வீடு. தன் பாட்டி சேதுவுடன் வாசலில் உட்கார்ந்தபடி புளியம்பழம் உடைத்துக் கொண்டிருந்தான், கலைஞர் - தயாளு தம்பதியின் மகன் உதயசூரியன்! அவரிடம் விஷயத்தைச் சொல்லி... குடும்ப உறுப்பினர்களின் பெயர்களை எல்லாம் விசாரித்தேன். அண்ணாதுரை, அஞ்சுகம், கலைஞர், தயாளு, தமிழரசு, கனிமொழி, செல்வி, (முரசொலி)செல்வம், உதயசூரியன், அறிவாலயம், ஆசைத்தம்பி, (எஸ்.எஸ்.)ராஜேந்திரன், தேன்மொழி என்று பட்டியல் நீண்டுகொண்டே போனது.