மதுராந்தகம், தாராபுரத்தில் தனித்துக்களம் கண்ட கம்யூனிஸ்ட் கட்சிகள் தங்களது டெபாசிட்டை இழந்து படுதோல்வியை சந்தித்துள்ளன. மதுராந்தகத்தில் மார்க்சிஸ்ட் கட்சி வேட்பாளராக பி.சுகந்தியும், தாராபுரத்தில் இந்திய கம்யூனிஸ்ட் கட்சி சார்பில் பி.லட்சுமணனும் போட்டியிட்டனர். தேர்தல் பிரச்சாரத்தின்போது தவெக அரசு மீது கடும் விமர்சனங்களை முன்வைத்தனர். வாக்கு எண்ணிக்கை முடிவில் பி.சுகந்தி 1,986 வாக்குகளையும், பி.லட்சுமணன் 1,157 வாக்குகளையும் மட்டுமே பெற்று டெபாசிட் இழந்தனர்.
தோல்வி குறித்து, இந்திய கம்யூனிஸ்ட் மாநில செயலாளர் மு.வீரபாண்டியன் கூறுகையில், “இந்த தேர்தல் முடிவு தெரிந்ததுதான். ஒரு அரசியலுக்காக இயங்கி வருகிறோம். எங்களுக்கு கிடைத்த வாக்குகள் மாசுபடாத வாக்குகள். எங்களுக்கு மரணமும் கிடையாது. தோல்வியும் கிடையாது” என்றார். இதேபோல் மார்க்சிஸ்ட் மாநில செயலாளர் பெ.சண்முகம் கூறும்போது, “பணபலம், அதிகார பலம் எதுவுமின்றி களம் கண்டோம். வீதிகளிலும் எங்களது பயணம் தொடரும்” என்றார். தேர்தல் முடிந்த பிறகு தவெகவுக்கு ஆதரவை கம்யூனிஸ்ட் கட்சிகள் வாபஸ் பெறபோவதாக செய்திகள் பரவி வந்தது குறிப்பிடத்தக்கது.
இந்த இடைத்தேர்தலில் தனித்துக் களம் கண்ட நாம் தமிழர் கட்சி இரு தொகுதிகளிலுமே படுதோல்வியை சந்தித்து டெபாசிட்டை பறிகொடுத்தது.வாக்கு எண்ணிக்கை முடிவில் மதுராந்தகம் தொகுதியில் நாம் தமிழர் கட்சி வேட்பாளர் ஜி.ஜானகிராமன் வெறும் 2,709 வாக்குகளை மட்டுமே பெற்று நான்காவது இடத்துக்குத் தள்ளப்பட்டார். கடந்த 2026 பொதுத்தேர்தலில் இதே தொகுதியில் அவர் பெற்ற 5,268 வாக்குகளில் பாதியை மட்டுமே இம்முறை பெற முடிந்தது.
அதேபோல தாராபுரம் தொகுதியிலும் வேட்பாளர் எம்.கார்த்திகா 5,268 வாக்குகள் மட்டுமே பெற்று டெபாசிட்டை இழந்தார். கடந்த பொதுத்தேர்தலில் இங்கு அக்கட்சி வேட்பாளர் திவ்யா வாங்கிய 6,026 வாக்குகளை விடவும் இது குறைவு என்பது குறிப்பிடத்தக்கது. 2026 சட்டப்பேரவைத் தேர்தலில் படுதோல்வி அடைந்து வாக்கு வங்கி 8 சதவீதத்தில் இருந்து 4 சதவீதமாக குறைந்த நிலையில், இந்த இடைத்தேர்தலிலும் டெபாசிட் இழந்தது தொண்டர்களை அதிர்ச்சியில் ஆழ்த்தியுள்ளது.
தேர்தல் பிரச்சாரங்களின்போது சீமானின் பேச்சை கேட்க கூடும் கூட்டமும், மில்லியன் கணக்கிலான சமூகவலைதள வியூஸ்களும் வாக்குகளாக மாறவில்லை என அரசியல் விமர்சகர்கள் விமர்சிக்கத் தொடங்கியுள்ளனர். இதனால் கட்சித் தொண்டர்கள் கவலை அடைந்துள்ளனர்.
இதனிடையே, பழனிசாமி மீதான கோபத்தாலும், சவுமியா அன்புமணி அமைச்சராகும் தகவலால் மதுராந்தகம், தாராபுரத்தில் தவெக வேட்பாளர்களுக்கு பாமகவின் வாக்குகள் சென்றுள்ளதும் கவனம் ஈர்த்துள்ளது.
இரு தொகுதிகளிலும் கணிசமான வாக்குகளை பாமக வைத்துள்ளதால், அவை யாருக்குச் செல்லும் என்ற நிலை ஏற்பட்டது. தவெக அரசுக்கு ஆதரவு தரும் கம்யூனிஸ்ட் கட்சிகள் அரசு மீது தொடர்ந்து விமர்சனங்களை வைப்பதையும், அமைச்சரவையில் இடம் பெற்றாலும் அவ்வப்போது விசிக தலைவர் விமர்சனம் செய்வதையும் முதல்வர் விஜய் விரும்பவில்லை. எனவே 4 எம்எல்ஏக்கள் வைத்துள்ள பாமகவை, கூட்டணியில் சேர்க்க முடிவு செய்ததாகக் கூறப்படுகிறது.
இதையடுத்து, கடந்த 2 மாதமாக தவெக கூட்டணியில் பாமக இணைய இருப்பதாகவும், அக்கட்சியின் சட்டப்பேரவை குழு தலைவர் சவுமியா அன்புமணி அமைச்சரவையில் இடம்பெற உள்ளதாகவும் தகவல்கள் வெளியாகின. இதனால் பாமக தொண்டர்கள் மகிழ்ச்சியில் உள்ளனர். இந்தச் சூழ்நிலையில், பாமகவின் வாக்குகள் தவெக வேட்பாளர்களுக்கு சென்றுள்ளன.
இது தொடர்பாக பாமகவினரிடம் கேட்டபோது, “2021-ம் ஆண்டில் அதிமுக ஆட்சி கடைசி நேரத்தில் வன்னியர்களுக்காக 10.5 சதவீத இடஒதுக்கீட்டை, அப்போதையை முதல்வர் பழனிசாமி வழங்கினார். ஆனால், அது கிடைக்காமல் போய்விட்டது. அதுதொடர்பாக பழனிசாமி இதுவரை பேசவில்லை.
இதனால், வன்னியர் சமூகத்தினரும், பாமகவினரும் அதிமுக தலைமை மீது கோபத்தில் உள்ளனர். மத்திய அரசின் சாதிவாரி கணக்கெடுப்பு முடிந்த பின்னர் தமிழக அரசு சமூகநீதி கணக்காய்வினை நடத்தும் என்று தவெக அரசு அறிவித்தது. இதற்காக, தவெக அரசை பாமக பாராட்டியது. அதனால், மதுராந்தகம், தாராபுரத்தில் பாமகவின் வாக்குகள் தவெக வேட்பாளர்களுக்கு சென்றுள்ளது” என்று பாமகவினர் தெரிவித்தனர்.