கடந்த சட்டப்பேரவைத் தேர்தலில் திமுக கூட்டணியில் 25 தொகுதிகளில் போட்டியிட்ட காங்கிரஸ் கட்சி 18 இடங்களில் வென்றது. ஆனால், இந்த முறை “ஆட்சியில் பங்கு, கூடுதல் தொகுதிகள் என கட்சி நிர்வாகிகள் மாணிக்கம் தாகூர், பிரவீன் சக்கரவர்த்தி போன்றோர் போர்க்கொடி தூக்கினர். இதற்கு திமுக தரப்பிலிருந்தும் பதிலடிகள் வர, கூட்டணிக்குள் விரிசல் விழுமோ என்ற பதற்றம் நிலவியது. இந்தச் சூழலில் சென்னை வந்த காங்கிரஸ் அகில இந்திய பொதுச் செயலாளர் கே.சி. வேணுகோபால், “திமுக - காங்கிரஸ் கூட்டணி உறுதியாக உள்ளது; ஆட்சியில் பங்கு என்பது காங்கிரஸின் அதிகாரப்பூர்வ நிலைப்பாடு அல்ல” என விளக்கமளித்தார்.
இருப்பினும், ராகுல் காந்திக்கு தெரிந்தே இந்த சர்ச்சையைக் கிளப்புகிறார்களோ என்ற சந்தேகம் திமுக தலைமைக்கு இருந்தது. இதைத் தொடர்ந்து வேணுகோபால் பலமுறை முயன்றும், ஸ்டாலினுடனான சந்திப்பு தள்ளிப்போய்க் கொண்டே போனது. இந்நிலையில்தான், திடீர் திருப்பமாக ஞாயிற்றுக்கிழமை இரவு 9 மணிக்கு சென்னை வந்த கே.சி.வேணுகோபால் ஆழ்வார்பேட்டையில் உள்ள முதல்வர் இல்லத்தில் ஸ்டாலினை சந்தித்துப் பேசினார். இதில் கனிமொழி எம்.பி. மற்றும் சத்தீஸ்கர் மாநில முன்னாள் துணை முதல்வர் சிங் தியோ ஆகியோர் மட்டுமே பங்கேற்றனர். சந்திப்பின்போது ராகுலிடம் ஸ்டாலின் தொலைபேசியில் பேசியுள்ளார்.
இந்தச் சந்திப்பில், முதல்வர் இல்லத்தில் தயார் செய்யப்பட்ட உணவை அருந்தியபடியே தொகுதிப் பங்கீடு குறித்து விவாதிக்கப்பட்டதாக கூறப்படுகிறது. இது குறித்து காங்கிரஸ், திமுக கட்சிகளின் மூத்த தலைவர்கள் சிலர் கூறும்போது, “மாணிக்கம் தாகூர் எம்.பி., நிர்வாகி பிரவீன் சக்கரவர்த்தி ஆகியோரின் விமர்சனங்கள் எல்லை மீறிச் செல்வதாகவும், இவ்வளவு கசப்புகளுக்குப் பிறகு கூட்டணியைத் தொடர வேண்டுமா என்றும் அமைச்சர்கள் பலரே முதல்வரிடம் கேள்வி எழுப்பினர்.
அதற்கு ஸ்டாலின், ‘தேர்தல் நேரத்தில் நமக்குச் சட்டரீதியாகவும், அரசியல் ரீதியாகவும் பல முட்டுக்கட்டைகள் வர வாய்ப்புள்ளது. அதை நாடாளுமன்றத்தில் எதிர்த்துப் பேசுவதற்கு காங்கிரஸின் பலம் நமக்கு அவசியம் தேவை எனக் கூறினார். இதனைத் தொடர்ந்து, ஸ்டாலின் நேரடியாக சோனியா காந்தியை தொடர்புகொண்டு நிலைமையை விளக்கியுள்ளார். இதையடுத்து ராகுலை அழைத்துப் பேசிய சோனியா, ‘திமுக நமக்கு இக்கட்டான பல நேரங்களில் தோள் கொடுத்த கட்சி, அவர்களை இழப்பது சரியான முடிவாக இருக்காது’ என கூறியிருக்கிறார்.
அதற்கு ராகுல், ‘கடந்த முறையே 40 இடங்கள் என்பதில் நான் பிடிவாதமாக இருந்தேன், நீங்கள்தான் 25-க்கு ஒப்புக் கொண்டீர்கள். இப்போதும் அப்படியேவா’ எனக் கேட்டுள்ளார். ‘பாஜக தமிழகத்துக்குள் காலூன்ற நாமேவழி ஏற்படுத்திக் கொடுத்துவிடக் கூடாது. கூட்டணி பலத்துக்காக சிலவற்றை விட்டுக் கொடுத்துதான் ஆக வேண்டும்’ என சோனியா கறாராகக் கூறிவிட்டார்.
இதன் பின்னரே, ராகுல் காந்தியின் உத்தரவின்பேரில் அவசர அவசரமாக வேணுகோபால் சென்னைக்கு அனுப்பிவைக்கப்பட்டு இந்த சந்திப்பு நிகழ்துள்ளது” என்று கட்சி நிர்வாகிகள் தெரிவித்தனர். அடுத்தகட்டமாக காங்கிரஸ் பேச்சுவார்த்தைக் குழு, தொகுதிப் பங்கீடு குறித்து பேச்சு நடத்தும் என தெரிவிக்கப்பட்டுள்ளது. முன்னதாக, திமுக கூட்டணியில் தேமுதிக ஐக்கியமானதும் இங்கே கவனிக்கத்தக்கது.