வாஷிங்டன்: அமெரிக்காவின் கொலராடோ மாகாணம், ஆஸ்பென் நகரைச் சேர்ந்தவர் ஆடம் ராபின்சன் (45). இவர் இரு சாப்ட்வேர் நிறுவனங்களை நடத்தி வந்தார். இந்த நிறுவனங்களின் சராசரி ஆண்டு வருவாய் 331 கோடியே 30 லட்சம் ரூபாயாக உள்ளது.
இளம் தொழிலதிபரான ராபின்சன் கடந்த 1-ம் தேதி மனைவி ஹெலன்(40), மகள் எம்மா(4), மகன் சார்லி(2) ஆகியோருடன் டெக்சாஸ் மாகாணம் ஆஸ்டின் நகரில் இருந்து பஹாமாஸ் தீவுக்கு தனியார் ஜெட் விமானத்தில் சென்றார். அவரது வீட்டு பணிப்பெண் அனிதா மரியா செடினா, குடும்ப நண்பர் ராச்சல் ரீட், சார்மி ஆகியோரும் விமானத்தில் பயணம் செய்தனர். விமானி ஜெப் கிரிகோரி (55), துணை பெண் விமானி நதாலியா (20) ஆகியோர் விமானத்தை இயக்கினர்.
புளோரிடா மாகாணம், பாம் பீச் பகுதியில் விமானம் பறந்தபோது குடியிருப்பு பகுதியில் விழுந்து வெடித்துச் சிதறியது. இதில் விமானத்தில் பயணம் செய்த 9 பேரும் உயிரிழந்தனர். கடைசி நிமிடங்களில் துணை விமானி நதாலியா கட்டுப்பாட்டு அறையை தொடர்பு கொண்டு, “விமானம் கட்டுப்பாட்டை இழந்து தரையை நோக்கி பாய்கிறது” என்று தெரிவித்துள்ளார்.
சுமார் 9,000 அடி உயரத்தில் விமானம் பறந்தபோது ரேடார் கண்காணிப்பில் இருந்து மறைந்தது. அமெரிக்காவின் மோசமான விபத்துகளில் இதுவும் ஒன்றாகக் கருதப்படுகிறது. விபத்துக்குள்ளான ஜெட் விமானம் 22 ஆண்டுகள் பழமையானது ஆகும். விபத்து குறித்து் அமெரிக்காவின் தேசிய போக்குவரத்து பாதுகாப்பு ஆணைய அதிகாரிகள் தீவிர விசாரணை நடத்தி வருகின்றனர்.