வென்றவருக்கு சீட் இல்லை... புதுக்கோட்டைக்கு இப்படி ஒரு சென்டிமென்டா?

புதுக்கோட்டை மாவட்டத்தில் கந்தர்வக்கோட்டை, விராலிமலை, புதுக்கோட்டை, திருமயம், ஆலங்குடி, அறந்தாங்கி என மொத்தம் 6 சட்டப் பேரவைத் தொகுதிகள் உள்ளன. இதில், மாவட்ட தலைநகரான புதுக்கோட்டை தொகுதிக்கு மட்டும் விநோதமான ஒரு சென்டிமென்டைச் சொல்கிறார்கள்.

1996-க்கு பிறகு, இங்கு எம்எல்ஏ-வாக வெற்றி பெற்ற யாருக்கும் மீண்டும் சீட் கிடைத்தாலும் ஜெயிப்பதில்லை என்பது தான் அந்த சென்டிமென்ட். புதுக்கோட்டையில் 1977 மற்றும் 1980-ல் காங்கிரஸ் சார்பில் ராஜகுமார் விஜயரகுநாத தொண்டமான் தொடர் வெற்றிகளைப் பெற்றார். அதன் பிறகு 1989 மற்றும் 1996-ல் திமுக வேட்பாளர் பெரியண்ணன் வெற்றி பெற்றார்.

பெரியண்ணனின் மறைவை அடுத்து 1997-ல் வந்த இடைத் தேர்தலில் திமுக சார்பில் பி.மாரியய்யா போட்டியிட்டு வெற்றி பெற்றார். ஆனால், அடுத்த தேர்தலில் இவருக்கு வாய்ப்பு இல்லை. அதேபோல் 2006-ல் அதிமுக வேட்பாளர் ஆர்.நெடுஞ்செழியன் வெற்றிபெற்றார். இவருக்கும் 2011-ல் சீட் இல்லை.

அதேசமயம் 2001-ல் அதிமுக சார்பில் புதுக்கோட்டையில் போட்டியிட்டு வெற்றி பெற்ற சி.விஜயபாஸ்கர் அடுத்த தேர்தலில் புதுக்கோட்டையின் ஜாதகம் தெரிந்ததாலோ என்னவோ விராலிமலைக்கு ஜம்ப் ஆகிவிட்டார். புதுக்கோட்டையில் 2011-ல் வெற்றி பெற்ற கம்யூனிஸ்ட் கட்சியின் எஸ்.பி.முத்துக்குமரன் ஓராண்டிலேயே விபத்தில் உயிரிழந்தார்.

இதையடுத்து, 2012-ல் நடைபெற்ற இடைத் தேர்தலில் அதிமுக வேட்பாளர் கார்த்திக் தொண்டமான் வெற்றிபெற்றார். இல்லாத அதிசயமாக 2016, 2021 ஆகிய தேர்தல்களிலும் தொண்டமானுக்கு புதுக்கோட்டையில் போட்டியிட சீட் கிடைத்தது. ஆனால், அவரால் மீண்டும் வெற்றிபெற முடியவில்லை.

இதேபோல், 2001 மற்றும் 2011 தேர்தல்களில் திமுக சார்பில் போட்டியிட்டு தோற்றுப் போன பெரியண்ணன் அரசு, 2016-ல் வெற்றி பெற்றார். ஆனால், அடுத்த தேர்தலில் அவருக்கு வாய்ப்புக் கொடுக்க வில்லை திமுக. 2021 தேர்தலில் திமுக சார்பில் போட்டியிட்டு வெற்றிபெற்ற முத்துராஜா தற்போது சிட்டிங் எம்எல்ஏ-வாக உள்ளார்.

என்றாலும் புதுக்கோட்டை தொகுதியில் ஒருமுறை ஜெயித்தவர்கள் தொடர்ந்து அடுத்த தேர்தலில் ஜெயிப்பதில்லை என்ற சென்டிமென்டை உடைப்பதற்காக முத்துராஜா மீண்டும் இங்கே சீட்டுக்கு முட்டி மோதுகிறார். இவருக்குப் போட்டியாக, புதுக்கோட்டையின் முன்னாள் எம்எல்ஏ-க்கள் சிலரும் வரிசை கட்டுகிறார்கள். 2026 தேர்தலில் சென்டிமென்டை தகர்த்து புது வரலாறை எழுதுமா புதுக்கோட்டை என்பதை பொறுத்திருந்து தான் பார்க்க வேண்டும்.