அமைச்சர் ரமேஷ் | கோப்புப் படம்
திருச்சி: கடந்த திமுக ஆட்சியில் இருந்தது போல தேவையில்லாத இடங்களில், வணிகரீதியான திட்டங்களை நாங்கள் கொண்டு வர மாட்டோம் என்று அமைச்சர் ரமேஷ் கூறினார்.
திருச்சி திருவானைக்காவல் ஸ்ரீமத் ஆண்டவன் கல்லூரியில், மாவட்ட நிர்வாகம் மற்றும் மாவட்ட வேலைவாய்ப்பு தொழில்நெறி வழிகாட்டும் மையம் சார்பில் தனியார் வேலைவாய்ப்பு முகாம் நேற்று நடைபெற்றது.
இந்து சமய அறநிலையத்துறை அமைச்சர் ரமேஷ் முகாமை தொடங்கி வைத்து, தேர்வானவர்களுக்கு பணி நியமன ஆணைகளை வழங்கினார். அதன்பின், அமைச்சர் ரமேஷ் செய்தியாளர்களிடம் கூறியதாவது: இந்து சமய அறநிலையத் துறை சார்பில் கடந்த திமுக ஆட்சியை போல தேவையில்லாத இடங்களில், தேவையில்லாத வணிகரீதியான திட்டங்களை நாங்கள் கொண்டு வர விரும்பவில்லை. திட்டங்களை அறிவித்துவிட்டு, பணம் கொடுக்காமல் பாதியில் நிறுத்தி வைப்பது அல்லது பணிகளை தொடங்காமலே இருப்பது போன்ற வேலைகளை நாங்கள் செய்யவில்லை.
கோயில்களுக்கு அடிப்படையாக என்ன தேவையோ அதை செய்வதற்கான நடவடிக்கை எடுத்து வருகிறோம். இதுகுறித்து முன்னாள் அமைச்சர் சேகர்பாபு முறையாக புரிந்து கொண்டு பதிலளிக்கலாம். கோயில்களில் எந்த பணிகளுக்கும், யாரிடமும் பணம் கொடுக்க வேண்டாம் எனப் பொதுமக்களுக்கு எச்சரிக்கை விடுக்கப்பட்டுள்ளது.
கோயில்களுக்கு வரும் கர்ப்பிணிகள், முதியவர்கள், மாற்றுத்திறனாளிகள் மற்றும் பச்சிளம் குழந்தைகளுடன் வருபவர்களுக்காக தனிவழி அமைக்கப்பட்டுள்ளது. சமீபத்தில் மாற்றுத்திறனாளிகளுக்காக மின்சார சக்கர நாற்காலிகளும் ஏற்பாடு செய்யப்பட்டுள்ளன. கோயில் தொடர்பான புகார்களை தெரிவிக்க பிரத்யேக வலைதளங்களும், தொலைபேசி எண்களும் ஏற்கெனவே அறிவிக்கப்பட்டுள்ளன. இவ்வாறு அவர் கூறினார்.