டிடிவி தினகரன்
திருப்பத்தூர்: திரைப் பிரபலங்கள் அரசியல் கட்சிகளில் இணைவது இயல்பான ஒன்றுதான். நடிகர் தனுஷ் அதிமுகவில் இணைந்தால் மகிழ்ச்சி என்று அமமுக பொதுச் செயலாளர் டி.டி.வி.தினகரன் கூறினார்.
விடுதலைப் போராட்ட வீரர்கள் மருது சகோதரர்கள் நினைவு தினத்தையொட்டி சிவகங்கை மாவட்டம் திருப்பத்தூரில் அவர்களது மணிமண்டபத்தில் உள்ள சிலைகளுக்கு டி.டி.வி.தினகரன் நேற்று மாலை அணிவித்து மரியாதை செலுத்தினார்.
பின்னர் செய்தியாளர்களிடம் அவர் கூறியதாவது: விவசாயிகள், தூய்மைப் பணியாளர்கள் உள்ளிட்ட பல்வேறு தரப்பினரும் போராட்டத்தில் ஈடுபடுகின்றனர். தவெக நிர்வாகிகள் சிலரே போதைப்பொருள் விற்பனையிலும் சமூகவிரோதச் செயல்களிலும் ஈடுபடுகின்றனர்.
இதுபோன்ற விஷயங்களில் அரசு நடவடிக்கை எடுத்து வருவதாக கூறினாலும் தமிழகத்தின் நிலை கவலைக்கிடமாக இருக்கிறது. தமிழகத்துக்கு சாபக்கேடான தவெக ஆட்சி விரைவில் வீழும். தூய்மையான ஆட்சியை வழங்குவதாகக் கூறி அதிகாரத்துக்கு வந்தனர். தற்போது அனைத்துத் துறைகளிலும் ஊழல் நிறைந்துள்ளது.
பழனிசாமி தலைமையில், மீண்டும் ஜெயலலிதா ஆட்சியை அமைக்க நாங்கள் அனைவரும் ஓரணியில் திரண்டுள்ளோம். வேலுமணி, சி.வி.சண்முகம், நத்தம் விஸ்வநாதன் உள்ளிட்டோர் தங்களது கருத்துகளை பொதுவெளியில் பேசுவதை தவிர்த்துவிட்டு, கட்சித் தலைமையுடன் பேச வேண்டும்.
திரைப் பிரபலங்கள் அரசியல் கட்சிகளில் இணைவது இயல்பான ஒன்றுதான். நடிகர் தனுஷ் அதிமுகவில் இணைந்தால் மகிழ்ச்சி. பழனிசாமியோடு இணைந்து திருமாவளவனை முதல்வராக்க முயற்சித்தோம்.
பாஜக கூட்டணியில் அதிமுக இருப்பதால், பழனிசாமியை முதல்வராக கம்யூனிஸ்ட்கள் ஏற்கவில்லை. திமுக ஆதரவை கேட்க நாங்கள் முயற்சிக்கவில்லை. அதேநேரத்தில், ஒருவேளை தவெக ஆட்சி அமைக்காவிட்டால், பழனிசாமியை முதல்வராக்க தவெகவிடம் ஆதரவு கேட்கும் திட்டத்திலும் இருந்தோம்.
திமுகவும் அதிமுகவும் ஒருபோதும் இணைந்து செயல்பட முடியாது. இரு கட்சிகளும் இணைவதாகக் கூறி விஜய் அரசியல் ஆதாயம் தேட முயற்சிக்கிறார். அவரது அரசியல் முகம் வெளிப்படத் தொடங்கியுள்ளது. இவ்வாறு அவர் கூறினார்.