தூத்துக்குடி: இருமொழிக் கொள்கைக்கு எதிராக செயல்படும் அதிகாரிகள் மீது கடும் நடவடிக்கை எடுக்கப்படும் என தமிழக அரசு எச்சரித்துள்ளது.
தூத்துக்குடி மாவட்டம் சாத்தான்குளத்தில் இருந்து நாசரேத் செல்லும் மாநில நெடுஞ்சாலையில் (எஸ்எச்-93) இரு தினங்களுக்கு முன்பு புதிய வழிகாட்டி பலகை அமைக்கப்பட்டது.
இதில், திருநெல்வேலி, ஆழ்வார்திருநகரி, தூத்துக்குடி, திருச்செந்தூர் ஆகிய ஊர்களுக்கு எத்தனை கிலோ மீட்டர், எந்த திசையில் செல்ல வேண்டும் என்பதை குறிக்கும் வகையில் பெயர்கள் எழுதப்பட்டிருந்தன.
முதலில் தமிழ் மொழியிலும், அடுத்ததாக இந்தி மொழியிலும், மூன்றாவதாக ஆங்கில மொழியிலும் ஊர்களின் பெயர்கள் எழுதப்பட்டிருந்தன. வழிகாட்டு பலகையில் இந்தி மொழி இடம் பெற்றிருந்தது பெரும் சர்ச்சையை கிளப்பியது.
இந்த வழிகாட்டி பலகை சமூக வலைதளங்களில் வைரலாகப் பரவியது. திமுக தலைவர் மு.க.ஸ்டாலின், பாமக தலைவர் அன்புமணி உள்ளிட்ட தலைவர்களும் தமிழ் ஆர்வலர்களும் கண்டனம் தெரிவித்தனர்.
இதையடுத்து, அந்த வழிகாட்டு பலகையில் இருந்த இந்தி பெயர்கள் நேற்று முன்தினம் இரவில் அவசர, அவசரமாக ஸ்டிக்கர் ஒட்டி மறைக்கப்பட்டன.
இதுதொடர்பாக, மாநில நெடுஞ்சாலைத்துறை உதவிக் கோட்ட பொறியாளர் பூமிநாதன், உதவிப் பொறியாளர் முத்துலட்சுமி ஆகியோர் உடனடியாக தற்காலிக பணிநீக்கம் செய்யப்பட்டுள்ளனர்.
இச்சம்பவம் தொடர்பாக, தமிழக அரசு சார்பில் வெளியிட்ட அறிக்கை: சாத்தான்குளம் - நாசரேத் மாநில நெடுஞ்சாலையில் (எஸ்எச்-93) புதிதாக வைக்கப்பட்ட வழிகாட்டிப் பலகையில் தமிழ் மற்றும் ஆங்கிலத்துடன், இந்தி மொழியிலும் ஊர்ப் பெயர்கள் எழுதப்பட்டிருந்தது தெரியவந்தவுடன் இந்தி எழுத்துகள் உடனடியாக நீக்கப்பட்டன.
தமிழக அரசின் இருமொழிக் கொள்கைக்கு எதிராக மாநில நெடுஞ்சாலைத் துறையின் வழிகாட்டிப் பலகையில் இந்தி இடம் பெற காரணமாக இருந்த நெடுஞ்சாலைத்துறை உதவிக் கோட்ட பொறியாளர் மற்றும் உதவிப் பொறியாளர் ஆகியோர் உடனடியாக தற்காலிகப் பணிநீக்கம் செய்யப்பட்டுள்ளனர்.
துறைரீதியான நடவடிக்கையும் எடுக்கப்பட்டு வருகிறது. தமிழக அரசின் இருமொழிக் கொள்கைக்கு எதிராக செயல்படும் அரசு அலுவலர்கள் மீது கடுமையான நடவடிக்கைகள் எடுக்கப்படும். இவ்வாறு அறிக்கையில் கூறப்பட்டுள்ளது.