சென்னை: தமிழகத்தில் விமான எரி பொருள் மீதான வாட் வரியை அரசு கணிசமாக குறைத்துள்ளது.
இதுகுறித்து வணிகவரித் துறை சார்பில் வெளியிடப்பட்ட அரசிதழ் அறிவிக்கையில் கூறப்பட்டுள்ளதாவது: தமிழ்நாடு மதிப்புக் கூட்டு வரிச் சட்டத்தின்படி விமான எரிபொருள் மீதான மதிப்புக்கூட்டு வரி (வாட்) தற்போது குறைக்கப்பட்டுள்ளது.
அதன்படி, சென்னை விமான நிலையத்தில் திட்டமிடப்பட்ட விமான சேவை நிறுவனங்களுக்கு எண்ணெய் நிறுவனங்கள் விற்பனை செய்யும் எரிபொருள் (ஜெட் எரிபொருள் உட்பட) மீதான வரி 29 சதவீதத்தில் இருந்து 16 சதவீதமாகக் குறைக்கப்பட்டுள்ளது.
சென்னையைத் தவிர, மாநிலத்தில் உள்ள பிற விமான நிலையங்களில் விமானங்களுக்கு நிரப்பப்படும் எரிபொருள் வரி 29 சதவீதத்தில் இருந்து 1 சதவீதமாக குறைக்கப்பட்டுள்ளது.
இந்த வரிக் குறைப்பு 2026 நவ.1 முதல் 2027 அக்.31-ம் தேதி வரை ஓராண்டு நடைமுறையில் இருக்கும். வரிச் சலுகையைப் பெற, எரிபொருள் விற்பனை செய்யும் நிறுவனம், அதை வாங்கும் விமான நிறுவனம் பூர்த்தி செய்து கையொப்பமிட்ட உறுதிமொழி படிவத்தை தங்கள் மாதாந்திர வரிக் கணக்குடன் சம்பந்தப்பட்ட மதிப்பீட்டு அலுவலரிடம் சமர்ப்பிக்க வேண்டும்.
இந்த படிவம் ஒவ்வொரு மாதமும் அளிக்கப்பட வேண்டும். வாங்கப்பட்ட எரிபொருள் உள்நாட்டு விமானப் பயன்பாட்டுக்கானது என்பதையும் அதில் விமான நிறுவனம் உறுதிசெய்ய வேண்டும்.