சென்னை: ஜல்லிக்கட்டு போட்டிகளில் காளைகளும், வீரர்களும் பங்கு பெறுவதை உறுதி செய்திட ஏதுவாக, ஆன்-லைன் பதிவு முறையை மாற்றி, அந்தந்த மாவட்ட அளவில் முடிவு செய்து கொள்ள வழிவகை செய்யப்படும் என்று தமிழக அரசு தெரிவித்துள்ளது.
இதுதொடர்பாக நேற்று தமிழக அரசு வெளியிட்ட செய்திக்குறிப்பில் கூறியிருப்பதாவது: தமிழகத்தில் பாரம்பரிய வீர விளையாட்டான ஜல்லிக்கட்டு நடத்துவதற்கு தேவையான அனைத்து உதவிகளையும் தமிழக அரசு தொடர்ந்து வழங்கி வருகிறது.
ஜல்லிக்கட்டுக்காகவே மதுரை அலங்காநல்லூரில் ‘கலைஞர் நூற்றாண்டு ஏறுதழுவுதல் அரங்கம்’ அமைக்கப்பட்டு ஜல்லிக்கட்டு நடைபெற்று வருகிறது.
கடந்த 17-ம் தேதி அலங்காநல்லூர் ஜல்லிக்கட்டு போட்டியை பார்வையிட்ட முதல்வர் மு.க.ஸ்டாலின், ஜல்லிக்கட்டு போட்டிகளில் சிறந்து விளங்கக்கூடிய மாடுபிடி வீரர்களுக்கு முன்னுரிமை அடிப்படையில் கால்நடை பராமரிப்புத் துறையில் உரிய அரசு பணியிடங்களில் பணியமர்த்திட வழிவகை செய்யப்படும் என்றும் உலகப் புகழ்பெற்ற தமிழகத்தின் ஜல்லிக்கட்டு காளைகளுக்கான சிறந்த உயர்தர சிகிச்சை மற்றும் பயிற்சி மையம் ரூ.2 கோடி செலவில் அலங்காநல்லூர் பகுதியில் அமைக்கப்படும் என்றும் அறிவிப்புகளை அறிவித்தார்.
மேலும், ஜல்லிக்கட்டு போட்டிகளை நடத்துவதில் இருக்கும் ஒருசில சிரமங்கள் அரசின் கவனத்துக்கு கொண்டுவரப்பட்டதைத் தொடர்ந்து, அவற்றைப் பரிசீலித்து காளைகளுக்கு எவ்வித துன்பமும் நேராவண்ணமும் ஜல்லிக்கட்டு போட்டிகளுக்கு இடையூறு இல்லாத வண்ணமும் தமிழக அரசு சில தளர்வுகளை வழங்கிட நடவடிக்கை எடுத்துள்ளது.
அதன்படி, உள்ளூர் காளைகளும் வீரர்களும் பங்குபெறுவதை உறுதி செய்திட ஏதுவாக, ஆன்-லைன் பதிவு முறையினை மாற்றி, அந்தந்த மாவட்ட அளவில் முடிவு செய்துகொள்ள வழிவகை செய்யப்படும். போட்டிகளின்போது இறக்க நேரிடும் மாடுபிடி வீரர்களுக்கு உரிய நிவாரணம் அரசு சார்பில் வழங்கப்படுகிறது.
எனவே, மாடுபிடி வீரர்களுக்கு ஆயுள் காப்பீடு கட்டாயம் என்ற விதி தளர்த்தப்படும். இதுவரை ஜல்லிக்கட்டு போட்டி நடத்துபவர்களிடம் முத்திரைத்தாளில் பெறப்பட்டு வந்த உறுதிமொழி பத்திரம் என்ற நடைமுறை ரத்து செய்யப்படும்.
தமிழகத்தின் பாரம்பரியத்தை காப்பதிலும் ஜல்லிக்கட்டு விளையாட்டினை தொடர்ந்து ஊக்குவித்திடவும் அரசு தொடர்ந்து செயல்படும். இவ்வாறு அதில் தெரிவிக்கப் பட்டுள்ளது.