அமைச்சர் அருண்ராஜ்
திருச்சி: தவெக ஆட்சியில் சிறு குறைகள் இருக்கத்தான் செய்கின்றன என்று தமிழக மருத்துவம் மற்றும் மக்கள் நல்வாழ்வுத் துறை அமைச்சர் அருண்ராஜ் தெரிவித்துள்ளார்.
திருச்சியில் நேற்று செய்தியாளர்களிடம் அவர் கூறியது: தமிழகம் முழுவதும் காலியாக இருந்த 4,724 செவிலியர் பணியிடங்கள் அந்தந்த மாவட்ட நலச் சங்கங்கள் மூலமாக வெளிப்படையான முறையில் நிரப்பப்பட்டு, பணி நியமன ஆணை வழங்கப்பட்டுள்ளது. எனவே, இனி செவிலியர் பற்றாக்குறை இருக்காது. மேலும், உயர் சிறப்பு மருத்துவர்கள் பற்றாக்குறையைப் போக்க புதிதாக 284 உயர் சிறப்பு மருத்துவப் பணியிடங்கள் உருவாக்கப்பட்டு, அவற்றுக்கான நியமன அறிவிப்புகளும் வெளியிடப்பட்டுள்ளன.
அதிமுக பொதுச் செயலாளர் பழனிசாமி இயலாமையில் இருப்பதால், தவெக ஆட்சிக்கு மைனஸ் பூஜ்யம் மதிப்பெண் வழங்குவதாகக் கூறியுள்ளார். ஏதாவது பேச வேண்டும் என்பதற்காக அவர் அப்படி சொல்கிறார். 6 மாத ஆட்சியைப் பற்றி மக்கள் என்ன சொல்கிறார்கள் என்பதை கேட்டுப் பாருங்கள்.
மக்கள் மிகவும் மகிழ்ச்சியாக இருக்கிறார்கள். ஊழலின்றி, நேர்மையாக மக்களுக்கு நல்லது செய்ய வேண்டும் என்ற ஒரே நோக்கத்துடன் முதல்வர் ஆட்சி நடத்தி வருகிறார். ஆட்சியில் ஆங்காங்கே சிறு குறைகள் இருக்கத்தான் செய்கின்றன. அவை சரி செய்யப்படும். அரசின் நோக்கத்தை மக்கள் தெளிவாக புரிந்து வைத்துள்ளார்கள். இவ்வாறு அவர் கூறினார்.