சென்னை: சென்னை மாநகரின் முக்கிய பகுதியான காமராஜர் சாலையில் கலங்கரை விளக்கம், மெரினா கடற்கரை, டிஜிபி அலுவலகம், அரசு அலுவலகங்கள், பள்ளி-கல்லூரிகள் அமைந்துள்ளன.
இதனால் காலை முதல் இரவு வரை அந்தப் பகுதியில் கடும் போக்குவரத்து நெரிசல் காணப்படுவது வழக்கமாக இருக்கிறது.
இதற்கு தீர்வு காணும் வகையில் மெரினா கலங்கரை விளக்கம் முதல் அடையாறு திருவிக பாலம் வரை 4 கி.மீ. தூரத்துக்கு உயர்மட்ட சாலை அமைக்க தமிழக அரசு திட்டமிட்டுள்ளது.
இதற்கான விரிவான திட்ட அறிக்கை (DPR) தயாரிப்பதற்கான டெண்டரை நெடுஞ்சாலைத்துறையின் சென்னை நகர சாலைகள் கோட்டம் கோரியுள்ளது. இந்த திட்ட அறிக்கை டெண்டரின் மொத்த மதிப்பு ரூ.38.10 லட்சமாக நிர்ணயிக்கப்பட்டுள்ளது.
அதன்படி இந்த திட்ட அறிக்கை தயாரிக்கும் பணியை 2 மாதங்களுக்குள் முடிக்க இலக்கு நிர்ணயிக்கப்பட்டுள்ளது. உயர்மட்டச் சாலையின் சீரமைப்பு, போக்குவரத்து நிலவரம், மண்ணின் தன்மை, கட்டுமான வடிவமைப்பு உட்பட பல்வேறு அம்சங்கள் குறித்த ஆய்வு இந்த திட்ட அறிக்கையை தயாரிக்கும் பணியில் மேற்கொள்ளப்பட உள்ளன.
இந்த டெண்டர் பெற விண்ணப்பிக்க ரூ.29,500 முன்வைப்புத் தொகையாக ஆன்லைனில் செலுத்த வேண்டும். டெண்டர் பெறுபவர், ஒப்பந்தத்தை நிறைவேற்றுவதற்காக கூடுதலாக ரூ.46,800 பாதுகாப்பு தொகையை செலுத்த வேண்டும்.
டெண்டர் ஆவணங்களை தமிழக அரசின் இணையதளத்தில் https://tntenders.gov.in இலவசமாகப் பதிவிறக்கம் செய்து கொள்ளலாம். ஆன்லைனில் டெண்டரை நவ. 2-ம் தேதிக்குள் சமர்ப்பிக்க வேண்டும் என்றும் டெண்டர் ஆவணத்தில் கூறப்பட்டுள்ளது.