சேலத்தில் உள்ள வெள்ளிப்பட்டறையில் கலைநயத்துடன் தயாரிக்கப்படும் வெள்ளிக்கொலுசுகள். (கோப்புப்படம்: எஸ். குரு பிரசாத்)
சேலம்: வெள்ளிக்கொலுசுத் தொழில், வட மாநிலங்களுக்கு இடம் மாறும் சூழல் உருவாகி வருவதால், உற்பத்தியாளர்கள் கவலை அடைந்துள்ளனர். இதன் எதிரொலியாக, ஆண்டுதோறும் பண்டிகைக் கால ஆர்டர்கள் குறைந்து வருவதாக அவர்கள் தெரிவித்துள்ளனர்.
தமிழகத்துக்குப் பெருமை சேர்க்கும் முக்கியத் தொழில்களில் ஒன்றாக சேலம் வெள்ளிக்கொலுசு உற்பத்தி விளங்குகிறது. சேலம் வெள்ளிக் கொலுசுகள் தரமாகவும், கைவேலைப்பாடுகள் நிறைந்ததாகவும் இருப்பதால், பல்வேறு மாநிலங்களுக்கும் வெளிநாடுகளுக்கும் ஏற்றுமதி செய்யப்படுகின்றன. சேலத்தில் சாவித்திரி, மேனகா, குஷ்பூ, எஸ்.செயின் ஆகிய பெயர்களில் கொலுசுகள் தயாரிக்கப்படுகின்றன. மேலும், கால் மெட்டி, மோதிரம், இடுப்புச் செயின், குழந்தைகளுக்கான கால் தண்டை உள்ளிட்ட வெள்ளி ஆபரணங்களும் தயாரிக்கப்படுகின்றன. வெள்ளி ஆபரணங்கள் என்றாலே சேலம் என்ற பெருமையும் உள்ளது.
தொழிலாளர் பற்றாக்குறையால், வெள்ளிக்கொலுசுத் தொழிலில் வெளிமாநிலத் தொழிலாளர்களின் பங்கேற்பு அதிகரித்து வருகிறது. இந்நிலையில், உற்பத்தியாளர்களிடையே ஒருங்கிணைப்பு இல்லாமை, நவீனமயமாக்கல் இல்லாமை உள்ளிட்ட காரணங்களால் வெள்ளிக்கொலுசுத் தொழில் சரிவடைந்துள்ளது.
இதுகுறித்து, சேலம் வெள்ளிக்கொலுசு உற்பத்தியாளர்கள் கைவினை நலச்சங்கத் தலைவர் ஆனந்தராஜன் கூறியதாவது: சேலம் மாநகரைச் சுற்றியுள்ள பகுதிகளில் 10 ஆயிரத்துக்கும் மேற்பட்ட வெள்ளிக்கொலுசுப் பட்டறைகள் உள்ளன. இத்தொழிலில் நேரடியாகவும் மறைமுகமாகவும் 10 லட்சத்துக்கும் மேற்பட்டோர் பயனடைந்து வருகின்றனர்.
ஒரு வெள்ளிக்கொலுசு, வெவ்வேறு 10 இடங்களில் படிப்படியாக உருவாக்கப்பட்டு முழுமையடைகிறது. மேலும், வெள்ளியின் அதிக மதிப்பு, தொழிலாளர்களுக்கு முன்பணம் வழங்குதல் உள்ளிட்ட காரணங்களால் இத்தொழிலுக்கு அதிக முதலீடு தேவைப்படுகிறது.
இத்தொழிலில் ஈடுபட்டுள்ளவர்களிடையே ஒற்றுமை குறைவாக உள்ளது. நவீன இயந்திரங்கள் இல்லாமை, புதிய வடிவமைப்புகளை உருவாக்குவதில் ஆர்வமின்மை உள்ளிட்ட சிக்கல்களும் உள்ளன.
ஆள் பற்றாக்குறையால் இத்தொழிலில் வட மாநிலத் தொழிலாளர்கள் ஈடுபடத் தொடங்கினர். அவர்களில் பலர் தொழில் நுணுக்கங்களைக் கற்றுக்கொண்டனர். இந்தச் சூழலை பயன்படுத்தி, வெளி மாநிலங்களில் இருந்து கொலுசு வாங்க வரும் வியாபாரிகள், குஜராத், மகாராஷ்டிரா உள்ளிட்ட தங்கள் சொந்த மாநிலங்களிலேயே அதிக முதலீடு செய்து, ஒரே கூரையின் கீழ் வெள்ளிக்கொலுசுகளை உற்பத்தி செய்து வருகின்றனர்.
எனினும், தரத்தின் அடிப்படையில் சேலம் வெள்ளிக்கொலுசுகளுக்கு சந்தையில் அதிக மதிப்பு உள்ளது. ஆனால், குறைந்த எடை, குறைந்த விலை காரணங்களால் வட மாநில வெள்ளிக்கொலுசுகளுக்கும் சந்தையில் வரவேற்பு உள்ளது. இதனால், சேலத்துக்கு வரும் வெள்ளிக்கொலுசு ஆர்டர்கள் ஆண்டுதோறும் குறைந்து வருகின்றன.
தற்போது, சேலத்தில் வெள்ளிப்பட்டறைகளின் எண்ணிக்கை 7 ஆயிரமாகக் குறைந்துவிட்டது. கடந்த ஆண்டு பண்டிகைக் காலத்தில் ஆர்டர்கள் 40 சதவீதம் வரை குறைந்த நிலையில், நிகழாண்டு மேலும் அதிகமாகக் குறைந்துள்ளது.
பல பட்டறைகளுக்கு இதுவரை பண்டிகைக் கால ஆர்டர்கள் வரவில்லை. எனவே, இடம் மாறும் சேலம் வெள்ளிக்கொலுசுத் தொழிலைப் பாதுகாக்க உற்பத்தியாளர்கள் ஒன்றிணைந்து முயற்சி மேற்கொள்ள வேண்டும். தமிழக அரசும் இத்தொழிலைப் பாதுகாக்கத் தேவையான நடவடிக்கைகளை எடுக்க வேண்டும். இவ்வாறு அவர் தெரிவித்தார்.