மாதிரி படம்
புதுச்சேரி: புதுச்சேரி அரசின் கலால் விதிகளின்படி, மதுக்கடைகளுக்கான உரிமம் பெற்றவர்கள் தங்களது சொந்த இன்ஸ்டாகிராம், பேஸ்புக் மற்றும் பிற சமூக வலைதளங்கள் மூலம் குறிப்பிட்ட பிராண்ட் மதுபானங்களையும், தங்கள் உரிமம் பெற்ற இடத்தையும் விளம்பரப்படுத்துவது தடை செய்யப்பட்டுள்ளது.
சமீப காலமாக, இந்த விதிகளை மீறி சில மதுபான கடைகள் இதுபோன்ற விளம்பரத்தில் ஈடுபடுவது கலால்துறைக்கு தெரிய வந்தது.
கருவடிக்குப்பத்தில் இயங்கி வரும் ஒரு மதுபானக் கடை மற்றும் நெல்லித்தோப்பு, திருவள்ளுவர் சாலையில் உள்ள ரெஸ்டோ பார் ஆகியன கலால் விதிகளை மீறி சமூக வலைதளங்களில் ‘ஒரு பீர் வாங்கினால் மற்றொரு பீர் இலவசம்’, ‘3 பீர் வாங்கினால் உணவு இலவசம்’ என வாடிக்கையாளர்களை கவரும் வகையில் விளம்பரம் செய்தது உறுதி செய்யப்பட்டது.
இதையடுத்து, கலால்துறை துணை ஆணையர் மேத்யூ பிரான்சிஸ் உத்தரவின் பேரில், வட்டாட்சியர் ராஜேஷ் கண்ணா மேற்பார்வையில் வருவாய் ஆய்வாளர்கள் மதுபானக் கடை மற்றும் ரெஸ்டோ பாருக்கு சீல் வைத்தனர்.