படங்கள்: எம். சாம்ராஜ்
புதுச்சேரி: அப்பா பைத்தியசாமி கோயிலில் முதல்வர் ரங்கசாமி பூஜை செய்து பாஜக தேசிய செயல் தலைவர், மத்திய அமைச்சருக்கு எலும்பிச்சை பழம், பிரசாதம் தந்தார்.
பாஜக தேசிய செயல் தலைவர் நிதின் நபின் இரண்டு நாள் பயணமாக புதுச்சேரி வந்தார். பொறுப்புக்கு வந்தபிறகு புதுச்சேரியில் நடைபெற்ற பூத் கமிட்டி கூட்டத்தில் முதலாவதாக பங்கேற்றார். இரண்டாவது நாளாக இன்று காலை முதல்வர் ரங்கசாமியை சந்திக்க கோரிமேட்டில் உள்ள அவரது இல்லத்துக்கு வந்தார்.
அவருடன் மத்திய அமைச்சர் மான்சுக் மாண்டவியா உள்ளிட்டோரும் வந்தனர். அங்குள்ள அப்பா பைத்தியசாமி கோயில் வாசலில் நின்று முதல்வர் ரங்கசாமி வரவேற்றார். கோயிலுக்குள் அழைத்து சென்றார். அப்போது முதல்வர் ரங்கசாமி பூஜை செய்தார். சாமி தரிசனம் நடந்தபிறகு எலும்பிச்சை பழம். பிரசாதம் வழங்கினார். அவர்களுடன் மேலிட பொறுப்பாளர் நிர்மல் குமார் சுரானா, பேரவைத்தலைவர் செல்வம், அமைச்சர் நமச்சிவாயம், மாநிலத்தலைவர் வி.பி.ராமலிங்கம், ஆகியோர் உடன் இருந்தனர். தொடர்ந்து கோயில் வளாகத்தில் உள்ள வீட்டுக்கு அழைத்து சென்றார்.
அங்கு முதல்வர் ரங்கசாமியும் நிதின் நிபின் மற்றும் மத்திய அமைச்சருடன் பேச்சுவார்த்தை நடத்தினார். அதைத்தொடர்ந்து முதல்வர் ரங்கசாமி கூறியதாவது: புதுச்சேரி வளர்ச்சி குறித்து பேசினோம். புதுச்சேரி வளர்ச்சியை கருத்தில் கொண்டு தேவையான நிதியை பெற எந்தெந்த துறைகளில் என்னென்ன செய்யலாம் என ஆலோசித்தோம்.
புதுச்சேரி மக்களுக்கு திட்டங்களை கொண்டு வந்து செயல்படுத்துகிறோம். இப்போது தேசிய ஜனநாயகக்கூட்டணி ஆட்சி நடக்கிறது நன்றி என்றார். அப்போது விஜய்யுடன் கூட்டணி செல்கிறீர்களா, பாஜக அமைச்சர் ஜான்குமார் ஜேசிஎம் உடன் இருக்கிறார்களே, பாஜகவுடன் கூட்டணி தொடருமா என்ற கேள்விகளுக்கு முதல்வர் ரங்கசாமி பதில் தரவில்லை.