மதுராந்தகம்/ தாராபுரம்: மதுராந்தகம், தாராபுரம் சட்டப்பேரவை தொகுதிகளில் தபால் வாக்குகள் பெறும் பணிகள் தொடங்கியுள்ளன.
இரு தொகுதிகளிலும் வரும் அக்.6-ம் தேதி இடைத்தேர்தல் நடைபெற உள்ளது. இந்நிலையில், முதிய வாக்காளர்களிடம் தபால் வாக்குகள் பெறும் பணிகள் நேற்று தொடங்கின. இதற்காக, மதுராந்தகம் தொகுதியின் தேர்தல் நடத்தும் அலுவலர் உத்தரவின்பேரில் 8 குழுக்கள் அமைக்கப்பட்டு 85 வயதுக்கு மேற்பட்டோர் மற்றும் மாற்றுத்திறனாளிகள் என 931 வாக்காளர்களிடம் தபால் வாக்குகளைப் பெற உள்ளனர்.
மேலும், சிறப்பு குழுவினர் 85 வயது மேற்பட்ட நபர்களின் வீடுகளுக்குச் சென்று வாக்குகளை பெறும் பணிகளிலும் ஈடுபட உள்ளதாக தேர்தல் அலுவலக வட்டாரங்கள் தெரிவித்தன.
இதேபோல் தாராபுரம் தொகுதியில் மொத்தம் 1,236 பேர் தபால் வாக்கு செலுத்தத் தகுதி பெற்றுள்ளனர். தபால் வாக்குகளைச் சேகரிக்கும் பணிக்காக மொத்தம் 30 சிறப்பு வாகனங்கள் ஏற்பாடு செய்யப்பட்டு, மண்டல வாரியாகப் பிரிக்கப்பட்டுள்ளன. ஒவ்வொரு வாகனத்திலும் தலா 6 அதிகாரிகள் வீதம் மொத்தம் 180 தேர்தல்அலுவலர்கள் கொண்ட குழுவினர் இப்பணியில்ஈடுபட்டுள்ளனர்.