அங்கீகார சம்திங் வழக்கில் சிக்கி இருக்கும் அந்த ‘ராசகுமாரரிடம்’ கிடுக்குப்பிடி விசாரணை நடத்தி இருக்கும் சம்திங் ஒழிப்பு அதிகாரிகள், முன்னாள் ‘மாண்புமிகுவை’ எப்படியாவது சிக்கவைக்க முடியுமா என்று பார்த்திருக்கிறார்கள். அவர்களுக்கு அதிகம் வேலை வைக்காமல் நிறைய ‘ஸ்கூப்’ விஷயங்களை கக்கியுள்ளார் ‘ராசகுமாரர்’.
அதை வைத்து அடுத்தகட்டத்துக்கு நகர்ந்தால், முன்னாள் ‘மாண்புமிகுவின்’ கிச்சன் கேபினட் வரைக்கும் கிரகப் ‘பலன்கள்’ நீள்கிறதாம். அதனால்தான் ‘ஆடி’யைச் சேர்ந்த உறவினர் வரைக்கும் சம்திங் அதிகாரிகள் குடைகிறார்களாம். இதனால் ஆடிப்போன முன்னாள் ‘மாண்புமிகு’, “எதுவாக இருந்தாலும் என்னோடு நிறுத்திக் கொள்ளுங்கள்.
வீட்டுக்குள் எல்லாம் போக வேண்டாம்” என்று விசில் தலைவர்கள் சிலருக்கு விண்ணப்ப தூது அனுப்பினாராம். இந்த விவகாரத்தில், ‘ஃபோர்ட்’ மாண்புமிகு தரப்பில் சற்றே ஆறுதலாகப் பேசி இருக்கிறார்களாம். அதனால் என்ன விலை கொடுத்தாவது ‘வீட்டைக்’ காப்பாற்றி விடலாம் என்ற தெம்பில் இருக்கிறாராம் முன்னாள் ‘மாண்புமிகு’.
இதற்கிடையே, மலைக்கோட்டை பக்கம் முன்னாள் ‘மாண்புமிகு’ பினாமிகளால் நடத்தப்பட்டு வரும் 2 ‘ஹைடெக்’ மனமகிழ் மன்றங்கள் விதிகளை மீறி செயல்பட்டதாக அண்மையில் அதிகாரிகளால் சீல் வைக்கப்பட்டது.
ஆனால், ஒரே மாதத்தில், அதற்கான ‘சம்பிரதாயச் சடங்குகளை’ முடித்து மீண்டும் அதை ஃப்ரைட்டாகத் திறந்து விட்டார்கள். இதற்கே கோடிகளில் கைமாறு நடந்ததாம். அதுபோல சம்திங் பிரச்சினையிலும் ஒரு வழி பிறந்துவிடும் என்ற நம்பிக்கையில் இப்போது கொஞ்சம் தெம்பாக இருக்கிறாராம் முன்னாள் ‘மாண்புமிகு’.