சென்னை: பணி நிரந்தரம், சம வேலைக்கு சம ஊதியம் கோரி சென்னையில் உண்ணாவிரதம் இருந்த செவிலியர்கள் கைது செய்யப்பட்டதைத் தொடர்ந்து, தமிழகம் முழுவதும் செவிலியர்கள் நேற்று போராட்டத்தில் ஈடுபட்டனர். காலிப்பணியிடங்களே இல்லாத நிலையில் போராடுவது ஜனநாயக உரிமை அல்ல என அமைச்சர் மா.சுப்பிரமணியன் விமர்சித்துள்ளார்.
திமுக அளித்த வாக்குறுதிப்படி, பணி நிரந்தரம் வழங்க வேண்டும். சம வேலைக்கு சம ஊதியம் என்ற உயர் நீதிமன்ற உத்தரவை எதிர்த்து உச்ச நீதிமன்றத்தில் தமிழக அரசு செய்த மேல்முறையீட்டை கைவிட வேண்டும் என்பன உள்ளிட்ட கோரிக்கைகளை வலியுறுத்தி தொகுப்பூதிய செவிலியர்கள் நேற்று முன்தினம் சென்னையில் உண்ணாவிரதப் போராட்டத்தில் ஈடுபட்டனர்.
தமிழ்நாடு செவிலியர்கள் மேம்பாட்டு கழகம் சார்பில் நடந்த இந்த உண்ணாவிரதப் போராட்டத்தில் 750-க்கும் மேற்பட்ட செவிலியர்கள் பங்கேற்றனர் அதைத்
தொடர்ந்து, மாலையில் செவிலியர்களைக் கைது செய்து வாகனத்தில் ஏற்றிய போலீஸார் கிளாம்பாக்கத்தில் இறக்கி விட்டனர். இதையடுத்து, கிளாம்பாக்கம் பேருந்து நிலையத்தில் செவிலியர்கள் நள்ளிரவில் போராட்டத்தில் ஈடுபட்டனர்.
இதைத்தொடர்ந்து அவர் களைக் கைது செய்து, ஊரப்பாக்கத்தில் உள்ள திருமண மண்டபத்தில் போலீஸார் அடைத்தனர். அங்கும் செவிலியர்கள் போராட்டத்தைத் தொடர்ந்தனர். செவிலியர்கள் கைது செய்யப்பட்டதைக்கண்டித்து, தமிழகம் முழுவதும் அரசு மருத்துவக் கல்லூரி மருத்துவமனைகள், மாவட்ட தலைமை மருத்துவமனைகளில் நேற்று செவிலியர்கள் போராட்டத்தில் ஈடுபட்டனர்.
அரசு மருத்துவர்களுக்கான சட்டப்போராட்டக் குழு தலைவர்மருத்துவர் எஸ்.பெருமாள் பிள்ளை வெளியிட்ட செய்திக்குறிப்பில் கூறியிருப்பதாவது: உண்ணாவிரதம் மேற்கொண்ட செவிலியர்களைக் கைது செய்தது கண்டிக்கத்தக்கது. தமிழகத்தில் அரசு மருத்துவமனைகளை நாடும் நோயாளிகள் எண்ணிக்கை 3 மடங்கு அதிகரித்துள்ளதாக அமைச்சர் பெருமையாகத் தெரிவித்துள்ளார். ஆனால் அதற்கு ஏற்றார்போல மருத்துவர், செவிலியர் பணியிடங்களை அதிகரிக்கவில்லை.
கரோனா நேரத்தில், அரசுக்கு உறுதுணையாக இருந்து, மக்களுக்காக போராடியவர்களை, ஆட்சி நிறைவடையும் நிலையில் சம ஊதியம் வேண்டி போராட வைப்பது அரசுக்கு அழகல்ல. எனவே, முதல்வர் தலையிட்டு, செவிலியர்களின் கோரிக்கைகளை நிறைவேற்ற வேண்டும். இவ்வாறு அவர் தெரிவித்துள்ளார்.
காலியிடங்கள் இல்லை: இதனிடையே சென்னையில் நேற்று அமைச்சர் மா.சுப்பிரமணியன் செய்தியாளர்களிடம் கூறியதாவது: செவிலியர்களை புறக்கணிக்கும் எண்ணம் அரசுக்கு இல்லை. போராட்டத்தில் ஈடுபட்டுள்ள செவிலியர்கள், இந்த அரசு பொறுப்பேற்ற பிறகு பணியில் சேர்ந்தவர்கள் இல்லை.
ஏற்கெனவே 9 ஆண்டுகளாக பணியாற்றி கொண்டிருப்பவர்கள். இவர்களுக்கு பணிநியமனம் வழங்குவது தொடர்பாக அரசாணை உள்ளது. காலியிடம் உருவாவதைப் பொறுத்து, இவர்களை சேர்க்க வேண்டும்.
இந்த அரசுப் பொறுப்பேற்றதற்கு பிறகு 3,783 செவிலியர்கள்பயன்பெற்றிருக்கிறார்கள். இன்னும் 8,322 பேர் பணிநிரந்தரம் செய்யப்பட வேண்டும். பணி ஆணைகள் வழங்கப்படும் போதே காலிப்பணியிடங்கள் உருவாகும்பட்சத்தில் பணிநிரந்தரம் செய்யப்படும் என்று தெரிவிக்கப்பட்டுள்ளது. காலிப்பணியிடங்களே இல்லை என்ற நிலையில் போராட்டங்கள் நடத்துவது ஜனநாயக உரிமை அல்ல.
அதேபோல் அவர்களுக்கு வழங்கப்பட்ட பணி ஆணைகளில் உள்ள விதிமுறைகளை தெரிந்து கொள்வது நல்லது. யாரையும் இந்த அரசு கைவிடவில்லை. கரோனா காலங்களில் பணிபுரிந்த 714 பேர் பட்டியலில் சேர்க்க இருக்கிறோம்.போராடும் செவிலியர்களுடன் பேச தயாராக இருக்கிறோம். மருத்துவக் கலந்தாய்வு தமிழகத்தில் காலியாகவுள்ள 23 எம்பிபிஎஸ், 27 பிடிஎஸ் இடங்களை நிரப்ப வரும் 20-ம் தேதி முதல் 23-ம் தேதி வரை சிறப்பு கலந்தாய்வு நடத்தப்படவுள்ளது. இவ்வாறு அவர் தெரிவித்தார்.