"என்.ஆர்.காங். - பாஜக கூட்டணி இருப்பதாக தெரியவில்லை" - எதிர்க்கட்சித் தலைவர் நாஜிம்

காரைக்கால்: புதுச்சேரியில் என்.ஆர் காங்கிரஸ்-பாஜக கூட்டணி இருப்பதாக தெரியவில்லை என சட்டப்பேரவை எதிர்க்கட்சித் தலைவர் ஏ.எம்.எச். நாஜிம் கூறியுள்ளார்.

காரைக்காலில் இன்று(அக்.4) செய்தியாளர்களை சந்தித்த அவர், “புதுச்சேரி தட்டாஞ்சாவடி தொகுதி இடைத்தேர்தலில் கைப்பற்றப்பட்ட சுமார் ரூ.4 கோடி மதிப்பிலான தங்க நாணயங்கள் யாருடையவை என தேர்தல் ஆணையம் இதுவரை தெரிவிக்கவில்லை.

தங்க நாணயங்கள் நகை வியாபாரிகளுடையதா அல்லது அரசியல் வியாபாரிகளுடையதா என தேர்தல் ஆணையம் தெளிவுபடுத்த வேண்டும்.

தங்க நாணயம் யாருடையது என மக்களுக்கு நன்றாக தெரியும், தேர்தல் அதிகாரி அதனை மக்களுக்கு வெளிப்படையாக தெரிவிக்க வேண்டும். இடைத்தேர்தலில் மக்கள் நல்ல தீர்ப்பை கொடுப்பார்கள், திமுக வெற்றி பெறும் என்ற நம்பிக்கை உள்ளது.

திமுக வெற்றி பெற்றால் எம்எல்ஏக்களின் எண்ணிக்கை 6-ஆக உயரும். எதிர்க்கட்சி வலுப்பெறும். எதிர்க்கட்சி வலுப்பெறுவது ஜனநாயகத்துக்கு நல்லது.

தட்டாஞ்சாவடி தொகுதியில் என்.ஆர்.காங்கிரஸ் வேட்பாளருக்கு ஆதரவாக பாஜக பிரச்சாரத்தில் ஈடுபடவில்லை. என்.ஆர்.காங்கிரஸ் - பாஜக கூட்டணி இருப்பதாக தெரியவில்லை. தேசிய ஜனநாயக கூட்டணி வேட்பாளர் என்று சொல்லவே கூடாது. இந்த இடைத்தேர்தல் முடிவு பல கேள்விகளுக்கு விடை அளிக்கும்.

புதுச்சேரி எம்எல்ஏ நேரு - அமைச்சர் மல்லாடி கிருஷ்ணராவ் இடையே நிலவும் பிரச்சினையை வளர விடக்கூடாது. இருவருமே பிரச்சினையை கையாண்ட விதம் தவறானது. முதல்வர் இதில் தலையிட்டு, இதற்கு முற்றுப்புள்ளி வைக்க வேண்டும்.

கஞ்சா உள்ளிட்ட போதைப் பொருட்கள் நடமாட்டத்தை புதுச்சேரி அரசு கட்டுக்குள் கொண்டு வர வேண்டும். உள்துறை அமைச்சர் நமச்சிவாயம் இது குறித்து தனிக் கவனம் செலுத்தி கடுமையான நடவடிக்கைகளை மேற்கொள்ள வேண்டும்.” என்றார்.

தமிழகத்தில் நடைபெறும் 2 தொகுதிகளுக்கான இடைத்தேர்தலில் தமிழக முதல்வர் விஜய், நாள் முழுக்க பிரச்சாரம் செய்து வருவது குறித்து செய்தியாளர்கள் எழுப்பிய கேள்விக்கு, "பொதுத் தேர்தலின் போது கேரவேனில் வந்து, அதிகம் பிரச்சாரத்தில் ஈடுபடாமல் எளிதாக வெற்றி பெற்று முதல்வராகி விட்டார். மக்கள் தீர்ப்பே மகேசன் தீர்ப்பு என்று ஏற்று திமுக செயல்பட்டு வந்தது.

தற்போது நடைபெறும் இடைத்தேர்தலில்தான் அரசியல் குறித்து தமிழக முதல்வர் விஜய்க்கு புரிந்திருக்கும். தமது ஆட்சியின் செயல்பாடு, அமைச்சர்கள் செயல்பாடு அனைத்தையும் புரிந்து கொண்டு இப்போது வீதியில் இறங்கி பிரச்சாரம் செய்து வருகிறார்.” என்று கூறினார்.