தேனி மாவட்ட சிறையில் ஆய்வு நடத்திய ஏடிஜிபி. சங்கர்.
ஆண்டிபட்டி: கைதிகள் தப்பிச் சென்ற விவகாரம் தொடர்பாக தேனி மாவட்ட சிறையில் சிறைத்துறை ஏடிஜிபி சங்கர் ஆய்வு நடத்தினார். இதுபோன்ற தவறு இனி நடக்காது என்று அவர் உறுதி அளித்தார்.
தேனி மாவட்ட சிறையில் இருந்து கடந்த 26-ம் தேதி இரவு போலீஸாரை தாக்கிவிட்டு 17 கைதிகள் தப்பிச் சென்றனர். அவர்களை போலீஸார் 36 மணி நேரத்தில் தேடிப் பிடித்து கைது செய்து நீதிமன்றத்தில் ஆஜர்படுத்தினர். பின்னர் கைதிகள் அனைவரும், தமிழகத்தின் பல்வேறு சிறைகளுக்கு மாற்றப்பட்டனர். இந்த சம்பவத்தையடுத்து சிறைத்துறை டிஜிபி சந்தீப்ராய் ரத்தோர் மாற்றப்பட்டார்.
இந்நிலையில், சிறைத்துறை ஏடிஜிபி சங்கர், தேனி மாவட்ட சிறையை நேற்று பார்வையிட்டு ஆய்வு செய்தார். கைதிகள் அடைக்கப்பட்டிருந்த சிறை, மூன்று கட்ட கதவுகளை கடந்து தப்பிச் சென்ற விதம், போலீஸார் மேற்கொண்ட தடுப்பு முறைகள் குறித்து விசாரணை நடத்தினார்.
பின்னர் செய்தியாளர்களிடம் அவர் கூறியதாவது: தேனி சிறையில் பாதுகாப்பு குறைபாடுகள் சரி செய்யப்பட்டுள்ளன. தமிழகம் முழுவதும் உள்ள அனைத்து சிறைகளிலும் பாதுகாப்பு பலப்படுத்தப்பட்டுள்ளது.
நிர்ணயித்த அளவைவிட கூடுதல் கைதிகள் சில நேரங்களில் சிறையில் இருப்பது உண்டு. அவ்வப்போது அவர்கள் மற்ற சிறைகளுக்கு மாற்றப்படுவர். தேனி சிறையில் கைதிகள் தப்பியது போன்ற தவறு இனிமேல் நடக்க வாய்ப்பில்லை.
இவ்வாறு அவர் கூறினார். ஆய்வின்போது, மதுரை சரக சிறைத் துறை துணைத் தலைவர் முருகேசன் உள்ளிட்ட அதிகாரிகள் உடனிருந்தனர்.